29 mamyrda Beıjińde ustalǵan 90 jastaǵy etnıkalyq qazaq elge qaıtaryldy, dep habarlaıdy Qamshy.kz aqparat agenttigi. 

Jaǵdaıdyń mán-jaıyn QR SİM-niń baspasóz hatshysy Ánýar Jaınaqov óziniń facebook paraqshasynda jarıalaǵan. 

"2018 jyly 2 maýsymda Qazaqstannyń Qytaıdaǵy Elshiligi men Qytaı Qoǵamdyq qaýipsizdik mınıstrligi arasyndaǵy ýaǵdalastyqtardyń arqasynda Qytaı Halyq Respýblıkasynyń Shyńjań-Uıǵyr avtonomıalyq aımaǵynda dúnıege kelgen 90 jastaǵy etnıkalyq qazaq Qazaqstanǵa qaıta oraldy", - delingen jazbada. 

QR Elshiligi Qytaıdyń quqyq qorǵaý organdarymen baılanysqa shyqqan. Nátıjesinde 90 jastaǵy etnıkalyq qazaqtyń qos azamattyǵy bar ekendigi belgili bolǵan.

"Qytaılyq tarap pen Qazaqstan Elshiliginiń kómegi arqasynda ustalǵandardyń Qytaı azamattyǵynan aıyrylý týraly qujatty jáne olardy aıyppulsyz ári ýaqytsha ustaý ızolátoryna qamaýsyz Qazaqstanǵa deportasıalaý tez arada rásimdeldi", - dep málimdedi SİM baspasóz hatshysy. 

90 jastaǵy Raıhan apa tarıhı otanyna oralǵan soń QR Syrtqy ister mınıstri Qaırat Ábdirahmanovqa rızashylyq bildirip vıdeoúndeý men alǵys hat joldaǵan. Hatta ol 2005 jyly Qazaqstan azamattyǵyn alǵanyn, 13 jyldan beri qos azamattyqpen júrgenin aıtady.

Qolynda eki tólqujaty bolǵan Raıhan apa zańdy durys bilmeı, Pekınde keleńsiz jaǵdaıǵa ushyraǵan. Qazaqstanǵa oralǵan soń uly ekeýi Qazaqstan azamattyǵyn saqtap qalýdy uıǵarypty.