Reseı prezıdenti Vladımır Pýtın AQSH Phenánniń ıadrolyq qarýdan tolyq arylǵanyn qalasa, onda Soltústik Koreıanyń "qaýipsizdigine kepildik berýi tıis" dep málimdedi.

Pýtın Qytaıdyń memlekettik Ortalyq radıo-televızıa stansıasynda 6 maýsym kúni jarıalanǵan suhbatynda AQSH prezıdenti Donald Tramp pen Soltústik Koreıa basshysy Kım Chen Yn arasynda 12 maýsymǵa josparlanǵan kezdesý "oń nátıje beredi" dep úmittenetinin aıtty.

Pýtın Soltústik Koreıa basshylyǵy samıt aldynda "buryn-sońdy bolmaǵan" birneshe qadam jasaǵanyn aıtty. Ol Phenánnyń zymyran jáne ıadrolyq qarý synaýdy toqtatyp, ıadrolyq synaq polıgonyn buzýy "nıeti oń ekenin kórsetetinin" aıtty.

Reseı prezıdenti buǵan qosa Donald Trampty Kım Chen Ynmen kezdesýge sheshim qabyldaǵany úshin "batyldyq pen kóregendik tanytty" dep maqtady.

Biraq ol Vashıngton eger Soltústik Koreıaǵa salynǵan sanksıalardy túgel joıý úshin Kım Chen Yn ıadrolyq qarýdan bas tartýy tıis degen talabynan aınymaıtynyn bolsa, onda Phenán qaýipsizdigine absalútti kepildik berilýin" talap etetinin aıtty.

"Bul, ásirese, Lıvıadaǵy qaıǵyly jaǵdaıdan keıin basqalaı bolýy múmkin emes" dedi Pýtın. Ol bul sózinde Lıvıa jetekshisi Mýammar Kaddafıdi ıadrolyq qarýdan bas tartýǵa kelisken soń Lıvıa kóterilisshileriniń NATO kómegimen bılikten taıdyrǵanyn meńzedi.

"Soltústik koreıalyqtar kóz aldynda ne bolyp jatqanyn kórip otyr, sondyqtan olar álbette, qandaı da bir kepildikter talap etedi" dedi Pýtın.

Ótken aptada Reseı syrtqy ister mınıstri Sergeı Lavrov Kım Chen Ynmen kezdesip, Tramppen aldaǵy kezdesý jaıyn talqylaǵan.

Soltústik Koreıa mınıstrleri de Kaddafıdi mysalǵa keltirip, Phenánnyń Lıvıa sıaqty ıadrolyq qarýdan tolyq bas tartýǵa kelispeıtinin aıtqan. Biraq AQSH ókilderi Kım Chen Yn aldaǵy samıtte kelisim jasalýy úshin ıadrolyq qarýdan múldem bas tartýy tıis ekenin birneshe ret qaıtalaǵan.