Premer-mınıstr Baqyt Saǵyntaev búdjet qarajatyn ıgermegen basshylardy  synnyń astyna aldy, dep habarlaıdy Qamshy.kz aqparat agenttigi. 

Úkimet otyrysyndaǵy qarjy mınıstri Baqyt Sultanovtyń baıandamasyna sáıkes respýblıkalyq nysandardyń qurylysyna 275,5 mıllıard teńge bólingen. Jyl basynan beri qarajattyń tek 15 paıyzy, ıaǵnı 42,2 mıllıard teńge ǵana ıgerilgen.

«Baqyt Túrlyhanovtyń esebine sáıkes, barlyq másele qurylysta bolyp tur. Bes aı ishinde tek 42 mıllıard teńgeni ıgergenbiz. Ýaqyt ótip barady, maýsymnyń aıaqtalý merzimi jaqyndap keledi. Qazan aıynda kún sýytady, qurylys máselelerin sheshý qıyndaı túsedi. Demek bizge ol óarajatty ustap otyrmaı, úkimetke qaıtaryp berý kerek. Bizge basqa mınıstrlerden qarajatty maqsatty túrde jumsaýǵa usynystar túsip jatyr», - dedi Saǵyntaev úkimet saǵatynda.

Sonymen qatar, Saǵyntaev vızıt-ortalyǵynyń qurylysyna baılanysty mádenıet mınıstrligin synǵa aldy.  Osyǵan deıin týrıserge qajetti ınfrastrýktýranyń barlyǵy, kafe, sheberhana, konferens-zal qarastyrylǵan ortalyqtardyń qurylysyn Qazaqstan boıynsha júrgizý josparlanǵan bolatyn.

«Mádenıet mınıstrligi vızıt ortalyqtyń qurylysyn bastaǵansha, týrısik maýsym ótip ketedi. Baıqaý áli ótken joq. Jobalyq-smetalyq qujattar daıyn emes. Onda nege aqshaı suraısyzdar? Aýyl sharýashylyǵy, qarjy mınıstrliginde de dál osyndaı másele. Demek bólingen qarjynyń bárin alyp basqa salaǵa bólip berý kerek. Báribir eshqandaı nátıje joq», - dep yzalandy mınıstrler kabınetiniń tóraǵasy.

Premer mınıstr, sonymen qatar, halyqaralyq banktermen kelisim júrgizýdiń uzaqqa sozylyp ketkenine ashýlandy.

«Jeńis Mahmuduly (ınvestısıa jáne damý mınıstri), munda Dúnıejúzilik bankpen nesıe boıynsha kelisim memlekettik organdardyń kelissózderinde qaralyp jatyr dep jazylǵan. Islam bankimen de osyndaı jaǵdaı. Munyń bári qashan aıaqtalady? Sizdiń áriptesterińiz osy zalda otyr. Barlyq kelissózderdi júrgizip bolǵansha qys túsetin boldy», - dep túıindedi premer mınıstr sózin.

Esterińizge salsaq, Astanada búgin áleýmettik-ekonomıkalyq damý jáne bes aı ishinde úkimet qarjysyn ıgerý qorytyndysy boıynsha úkimet ótyrysy ótti.