Men bala kezimde Qadir túniniń sáýlesin kórgenmin...

/uploads/thumbnail/20180612122222422_small.jpg

Bala kezim. Shamamen 11-12 jastamyn ǵoı deımin. Tún ortasy aýyp ketken shaq. Aýyldan 7 shaqyrym qashyqtyqta ornalasqan qystaýdaǵy eski úıimizdiń bir bólmesinde otbasy músheleri túgel qaz-qatar tizilip jatyrmyz. Adamdardyń bári oıaý. Taqyryptan taqyryp týyndap, qyzý áńgimeniń tıegin aǵytqan sát. Kenet...

Bólmeniń ishi adam betindegi kishkentaı meń de kórinetindeı jap-jaryq bolyp ketti! "Mássaǵan, bul ne?", – dep ornymnan ushyp túregeldim. Úıdegiler "Ne boldy?", "Nege atyp turdyń?" desip, abdyrap qaldy. Col kezde álgi jaryq 2-3 sekýndtaı turyp, ǵaıyp boldy. "Jańaǵy ne jaryq?", – dedim qasymda jatqandarǵa. Sóıtsem, ol menen basqa eshkimge kórinbepti. Áńgime tyńdap oıaý jatqanymdy aıtsam da senbeı, bári meni túsimnen shoshyp oıanǵan etip qoıdy...

Tańerteń maldy óriske aıdar aldynda shaı iship otyryp, ádettegideı ákemniń keńestik sary radıosyn pysyr-pysyr etkizip, áýe tolqynynan "Qazaq radıosynyń" jelisin taýyp alyp tyńdadyq. Mine, qyzyq! Tańǵy jańalyqtardan keshe Qadir túni bolǵanyn, sol túni bálen adamnyń meshitterde duǵa oqyp, tilek tilegenderin habarlap jatyr. Demek, men qasıetti Qadir túniniń sáýlesin kórgenmin! Ol kezde duǵa-tilekke til syndyrmaq túgil, Qadir túniniń ne ekenin de bilmeıtin kezim edi ǵoı.

Es bilip, etek jıyp, Astanada gazet paraqtap otyratyn deńgeıge jetkende, Shymkent jaqta túnde qonaqtan kele jatyp, adasyp ketken bir kelinshektiń aldynan jaryq sáýle paıda bolyp, jolyn aıqyn etip kórsetkenin oqyp qaldym. Búgin de feısbýk áleýmettik jelisinde Quralaı İzbasarova degen kisi soǵan uqsas bir jaıtty bólisti.

"Meniń naǵashy atam sáresige deıin maldyń jáıin qaraıyn dep dalada júrgende, dala kúndizgideı jap-jaryq bop ketkenin kórip, buryn kórmegen qubylys bolǵandyqtan, aǵashty qushaqtap alyp "astapyralla" deı beripti. Tap sol túni masahana quryp, dalada jatqan sheshem kenet oıanyp ketken de "jańa ǵana jatyp edik qoı, munysy nesi? Alla-aı, bala-shaǵam aman bolsa eken" dep ımanyn úıiripti. Bul tek birneshe sekýndqa ǵana sozylǵan oqıǵa eken. Ertesine Qadir túnindegi aspannyń ashylǵanyn kórgenderin úlken atasy túsindirip beripti. Kúshti tilek tilemegenderine ókinetinin anamyz bizge aıtyp otyrady" dep jazǵan Quralaı hanym. Al meniń áli kúnge deıin kóz aldymnan ketpegen bala kezimdegi álgi tylsymdy qaǵaz betine búgin bir-aq túsirýime osy jazba túrtki boldy. Bir ǵajaby, ol jaryqtyń naǵashy atasy men sheshesine qatar kóringenin aıtyp otyr. Sonda bizdiń úıde belgisiz sáýleni qalaısha menen basqa eshkim kórmeı qaldy eken?..

Negizinde tek búgin ǵana tańǵy 7-ge deıin otbasyma, dostaryma arnap kóptegen duǵa-tilekter oqýmen boldym.

 

Erkeǵalı BOLATULY

Qatysty Maqalalar