AQSH Qarjy mınıstrligi Reseıge qarsy jańa sanksıalar salynǵanyn habarlady. Mınıstrliktiń málimetinshe, jańa sanksıaǵa reseılik úsh kompanıa men Reseımen baılanysty eki halyqaralyq qurylym ilingen.

Sanksıa Sankt-Peterbýrgtiń súńgýir jáne sýastynda qoldanylatyn qural-jabdyqtar jasaýmen aınalysatyn "Daıvtehnoservıs" kompanıasy men onyń ıesi Vladımır Kaganskııge, kompanıanyń bas dırektory Aleksandr Trıbýn jáne menedjeri Oleg Chırıkovke salynǵan.

AQSH qarjy mınıstrliginiń deregi boıynsha, "Daıvtehnoservıs" 2011 jyly Federaldyq qaýipsizdik qyzmetimen 1,5 mıllıon dollarǵa sýasty apparattaryn jasaý týraly kelisim jasasqan.

Vedomstvo habarlamasynda sanksıa salýǵa reseılik jeke jáne zańdy tulǵalardyń Lıvıamen baılanysy jáne kıbershabýyldarǵa qatysy bary sebep bolǵany aıtylady.