Ózbekstan bıligi prezıdentke arnap óleńder jazýǵa, beıneklıpter túsirýge tyıym saldy. Atalmysh málimdeme «Ózbekkonsert» memlekettik mekemesinde jasaldy.

«Ózbekkonsert» dırektory Azamat Haıdarov aıtýynsha, memleket basshylaryna klıp túsirý nemese óleń arnaý etıkaǵa jatpaıdy.

Birneshe apta buryn 49 jastaǵy ánshi ári aktrısa Dılfýza Ismaılova prezıdentke arnap «Bul ádemi mekenniń sultany aman bolsyn» degen klıp túsirgen. Vıderolık YouTube arnasynda 21 mamyrda paıda boldy, alaıda kóp uzamaı ony óshirip tastaǵan. Ánniń sózderi prezıdentti «qudaıdyń kóleńkesi ári súıikti quly» retinde kórsetti. Bıliktiń mundaı sheshim qabyldaýyna ánshiniń osy áni sebep bolǵan.

Aıta keteıik, birneshe aı buryn áleýmettik jelide qazaqstandyq aqyn Baltabek Nurǵalıevtiń aty jer jaryp turdy. Ol prezıdent Nursultan Nazarbaevqa, onyń ákesi Ábishke, anasy Áljanǵa, qyzy Darıǵaǵa jeke-jeke óleń arnap, jelidegi paraqshasyna jarıalap turatyn. Tipti memlekettik qyzmet isteri jáne sybaılas jemqorlyqqa qarsy is-agenttigin madaqtap jazǵan odasy da jelige tarap, halyq arasynda qyzý talqylanǵan. Oqyrmandar Baltabektiń shyǵarmalaryn qatty synap, «jaǵympazdyqtyń shyńy» dep baǵalady. Bul týraly aqynnyń ózi Elbasyna degen ystyq yqylasyn bildire otyryp, danyshpandyǵyna ılanatynyn aıtqan. Buǵan qosa «eldi Nazarbaevtar dınastıasy bıleý kerek» dep qalyń jurtty shalqasynan bir túsirgen.