Nurtaı Ábiqaev "Otandastar qory" AQ prezıdenti bolyp saılandy. Bul málimetti uıym ókilderi rastady, - dep habarlaıdy Tengrinews.kz.

Eske sala keteıik, Nursultan Nazarbaev byltyr qazaqtardyń V dúnıejúzilik quryltaıy kezinde "Otandastar" qoryn qurýdy tapsyrǵan bolatyn.

"Biz Soltústik Kavkazdan adamdardy qabyldadyq, olarǵa esigimizdi ashtyq. Nege biz ózimizdiń qazaqtardy bólýimiz qajet? Sondyqtan men bıznesmenderdi osyǵan úles qosýǵa shaqyramyn. Quryltaı basshylyǵy, Prezıdent ákimshiligi jáne úkimettegilerge joǵaryda aıtyp ótken qordy qurýdy tapsyramyn", - degen edi Memleket basshysy.

Nurtaı Abyqaıuly Ábiqaev 1947 jyly Almaty oblysy Jambyl aýdany Jambyl aýylynda dúnıege kelgen.

1970 jyly Keńes Áskeriniń qatarynda qyzmet etken. 1972 jyldan  Almaty aýyr mashına jasaý zaýytynyń aǵa ınjeneri, ınjener-konstrýktory. 1976 jyldan bastap Qazaqstan Kompartıasy Almaty qalasy Áýezov aýdandyq komıteti partıalyq-uıymdastyrý bóliminiń nusqaýshysy, 1977 jyldan - ónerkásip-kólik bóliminiń nusqaýshysy, 1978 jyly ónerkásip-kólik bóliminiń meńgerýshisi, 1980 jyly Qazaqstan Kompartıasy OK aýyl sharýashylyǵy mashınalaryn jasaý bóliminiń nusqaýshysy. 1984 jyly Qazaqstan Kompartıasy OK hatshysynyń kómekshisi qyzmetterin atqarǵan.

Sondaı-aq Nurtaı Ábiqaev QR Ulttyq qaýipsizdik komıtetiniń tóraǵasy bolǵan.