QR Balalar quqyqtary jónindegi ýákil qyzmetine jańadan taǵaıyndalǵan Sáýle Aıtpaeva aldaǵy josparlary týraly aıtyp berdi, dep habarlaıdy Qamshy.kz aqparat agenttigi. 

«Árıne, aldymen bárin qarap shyǵý qajet. Osy jumystyń negizinde aldaǵy josparlar da jasalady. Sóz joq, balalar quqyqtaryn qorǵaý máselesine basa nazar aýdarylady. Men ózi bir kúnniń ishinde mıllıondaǵan balanyń anasy bolyp shyqtym. Bul – úlken jaýapkershilik, úlken senim. Al jaýapkershilik bar jerde jumys ta kóp. Men ózim bir nárseni aldyn ala aıtpaımyn, naqty faktimen sóılegendi jaqsy kóremin», – dedi S.Aıtpaeva jýrnalıserge bergen suxbatynda.

Onyń aıtýynsha, balalar quqyqtaryn qorǵaý úshin aldymen ana men áke ınstıtýtyn kúsheıtý kerek. Muǵalimder de balanyń kóńiline basa nazar aýdarýy qajet.

«Birinshiden, ata-analar óz balasynyń jaǵdaıyn túsinýi kerek. Ony qandaı máseleler mazalap júr? Nege alańdaıdy? Sonyń bárin bilýi tıis. Ekinshiden, muǵalimder de balanyń jaǵdaıyn baqylýy qajet. Áli esimde, bizdiń kezimizde muǵalimder anamyz sıaqty boldy. Otbasynyń jaǵdaıyn, balanyń qandaı máselege alańdap júrgenin – bárin-bárin bilip otyratyn. Menińshe, qazirgi synyp saǵattaryn muǵalim men bala arasyndaǵy baılanysty ornatýǵa arnaý qajet. Negizi, muǵalimge, anaǵa, ákege degen senim bolsa, balanyń óz-ózine degen senimi de myqty bolady. Dál osy senimdi kúsheıtýimiz kerek. Áke kodeksi, ana kodeksi sıaqty bir qujat bolý kerek sıaqty. Sonda naqty aqyl-keńesterdi kórsetýge bolady», – dep atap kórsetti  Aıtpaeva.

Esterińizge salsaq,  keshe Prezıdenttiń ókimimen QR Parlament Senatynyń depýtaty Sáýle Aıtpaeva QR Bala quqyqtary jónindegi ýákil qyzmetine taǵaıyndaldy. Sáýle Muhanbedıanqyzy - Qazaqstannyń tuńǵysh áıel generaly. Osynaý joǵary shendi 2013 jyly Otan Qorǵaýshylar kúni Prezıdent Nursultan Nazarbaevtyń ózi tabys etken bolatyn.