23 maýsymda ótetin mıtıńige shyqpaımyn jáne ózgelerge de shyqpaýǵa keńes beremin. Nege ekenin túsindirip óteıin.

1.Áblázov men úshin avtorıtetti tulǵa emes, tipti ol úshin bir jerge aıaq attap basýǵa turmaıdy. Qala berdi, ol opozısıa lıderi de, monopolıalyq ókil de emes.

Ózin ımam Homeını retinde kórsetkisi kelgen bolar, biraq onysynan da túk shyqpaıdy. Ol – búgingi bılik júıesiniń nátıjesi, ol – qylmysker. Bireýdi synamas buryn ózi qanshama zańdy suraqtarǵa jaýap berýi tıis.

2. Popýlızmge ǵana jeteleıtin Áblázovtyń nasıhatyn múldem unatpaımyn. Tegin bilim, tartyp alyp, bólip berý, tegin taratý, tegin salý – munyń bári neobolshevızm. Onsyz da ydyraýǵa shaq qalǵan qoǵamdy jik-jikke bóletin amal ǵana.

Bólshevıktik urandardyń sońy nege ákep soqqany tarıhtan belgili: atys, soǵys jáne ashtyq.

3. 23 maýsymdaǵy mıtıń – arandatý. Bul kún – polısıa men memlekettik qyzmetkerlerdiń kásibı merekesi. Munyń túbi janjalǵa ákep soǵatynyn túsiný úshin artyq oılanýdyń qajeti joq.

Áblázovtyń dál osy kúndi tańdaýynyń astarynan mynany ańǵarýǵa bolady: ol halyq pen polısıany qaǵystyryp qoıyp, qan tógilgenin qalaıdy. Onyń logıkasy óte qarapaıym: neǵurlym kóp adam zardap shekse, soǵurlym jaqsy. Menińshe, Parıjde otyryp alyp halyqty bılikke aıdap salýǵa Áblázovtyń moraldyq quqyǵy joq. Árıne, onyń shaqyrǵan aksıalaryna qatysyp, aıtqanynan shyqpaıtyndar zardap shekse, jaýap beretin de, moraldyq, qarjylyq shyǵyndaryn óteıtin de ózi emes. Ony qoldamańyzdar demeımin, alaıda ózim onyń quralyna aınalǵym kelmeıdi.

Jaǵdaıdy qıyndatyp, Áblázovty nasıhattap otyrǵan – bıliktiń ózi, buǵan anyq kózim jetti. Onyń paraqshalaryn buǵattap áýrelengenshe, pikirsaıystar men ashyq keńistikke múmkindik berip, telearnalar qurý kerek. Mıtıńilerge tyıym salǵannan saıası alańdy keńeıtip, mıtıńiler jaıly zańdy jeńildetý áldeqaıda tıimdi. Ár qalada halyq óz pikirin erkin bildire alatyn, narazylyǵyn jetkize alatyn Gaıd-park bolýy tıis.  Eldiń damýyn kózdeıtin ondaǵan partıa qurylsyn. Olar bir-birine básekeles bola otyryp, eldiń damýy men kórkeıýine septigin tıgizetin bolady.

Aıdos Sarymnyń Facebook paraqshasynan