Bas prokýratýra áleýmettik jelide «Qazaqstannyń demokratıalyq tańdaýy» ekstremıstik uıymynyń arandatý habarlamalary men beınerolıkteriniń taraǵanyn anyqtady, dep habarlaıdy Qamshy.kz aqparat agenttigi QR Bas Prokýratýranyń baspasóz qyzmetine silteme jasap. 

Onda atalǵan uıymnyń basshysy Muhtar Áblázov pen onyń sybaılastary Qazaqstan azamattaryn 2018 jylǵy 23 maýsymda mıtıńke shyǵýǵa shaqyrady.

«DVK-nyń» ıdeıalary men mıtıńterdi úgitteý úshin Áblázovqa shetelde qazaqstandyq sot tóreliginen jasyrynyp júrgen Janar Ahmetova, Bota Djardemalı jáne basqa adamdar kómektesýde.

Olardyń is júzindegi maqsaty – qylmystyq qýdalaýdy saıasattandyryp, Qazaqstanda aýyr jáne asa aýyr qylmystardy jasaǵany úshin jaýapkershilikten jaltarý.

Jarıalanǵan beınerolıkterdi túsirý úshin Áblázovtyń aqshasyna Kıev qalasynda jarnamalyq agenttik jáne azıattyq kelbetti kásibı akterlar men modelder jalǵa alynǵan.

Olar Qazaqstan Respýblıkasynyń azamattary emes.

Beınerolıkterdiń mazmuny shyndyqqa janaspaıdy jáne qazaqstandyq qoǵamda áleýmettik alaýyzdyq pen arazdyqty týdyrýǵa baǵyttalǵan.

Ústimizdegi jyldyń 12 maýsymynda Youtube kanalynda «Muǵalimder Áblázovtyń mıtıńisine shyǵady» degen beınerolıkte «qazaqstandyq jas muǵalim» rólin Kıev qalasynda tańdalǵan aktrısa oınaǵan. 

Youtube-tyń basqa beınematerıalynda Qazaqstanda jumys isteıdi degen jáne halyqty 23 maýsymda mıtıńke shyǵýǵa shaqyrǵan jas jigit - Áblázovtyń týǵan jıeni Aıdar Amangeldıev. Ol Qazaqstannan 2009 jyly kóship ketken.

Qazirgi ýaqytta ol Shotlandıanyń qymbat ýnıversıtetteriniń biri - «Glazgoý Kaledonıanyń» stýdenti. Bul ýnıversıtette jyl saıynǵy oqyp turý tólemaqysy 20 myń sterlıń fýntty nemese 9 mln teńgeni quraıdy.

Sotpen 2018 jylǵy 13 naýryzdan bastap Qazaqstan Respýblıkasynyń barlyq aýmaqtarynda  «DVK-nyń» is-áreketine tyıym salynǵanyn esterińizge salamyz.

Bas prokýratýra «DVK-nyń» kez kelgen ekstremıstik áreketine  qatysý jáne ony qarjylandyrý úshin Qazaqstan Respýblıkasy Qylmystyq kodeksiniń 258 jáne 405-baptaryna sáıkes qylmystyq jaýaptylyqqa tartylatynyn qaıtalap túsindiredi.

Mıtıńke shyǵýǵa úgitteý - «Beıbit jınalystar, mıtıńiler, sherýler, pıketter jáne demonstrasıalar uıymdastyrý men ótkizý tártibi týraly» Zańnyń erejelerin buzady.

Ashyq aksıalardy ótkizý úshin 10 kún buryn tıisti aryz bere otyryp, jergilikti atqarýshy organnyń ruqsatyn alý qajet.

Búgingi tańda ákimdikterge ústimizdegi jyldyń 23 maýsymynda mıtıń ótkizý týraly aryzdar túspegen.

Osyǵan baılanysty, mıtıńter zańsyz bolyp tabylady, olardy uıymdastyrý men oǵan qatysqany úshin Qazaqstan Respýblıkasy Ákimshilik quqyq buzýshylyqtar týraly kodeksiniń 488-babyna sáıkes jaýaptylyq, onyń ishinde 15 táýlikke qamaýǵa alý kózdelgen.

"Prokýratýra týraly" Zańmen kózdelgen ókilettikterdi paıdalanyp, barlyq  azamattardy zańdylyqty jáne qoldanystaǵy qazaqstandyq zańnamanyń talaptaryn qatań saqtaýǵa, arandatýshylyqqa jáne quqyq buzýshylyqqa jol bermeýge shaqyramyz", - delingen vedomstva habarlamasynda.