Jasýr Amırovtiń sózine qaraǵanda, eki jyl buryn onyń ata-anasy ajyrasqan, Jasýr ákesimen birge Termezde turǵan, al ekinshi márte turmysqa shyqqan anasy eki qyzymen Gıssarǵa kóship ketken. Ótken jyly qazan aıynda jas jigit tájik vızasyn alyp, anasymen kórisý úshin Tájikstanǵa barǵan.

Biraq Jasýr anasymen birge uzaq tura almady. Birneshe kúnnen soń onyń anasy Dılfýza Alıkýlova Túrkıaǵa jumysqa ketken, az ýaqyttan soń ógeı ákesi balany úıden qýyp shyqqan. Jasýrdyń úıine qaıtatyn aqshasy bolmaǵan, sol sebepti ol qara jumys isteýge shyqqan. Jolda jergilikti bir turǵynmen kezdesip, ol Jasýrdy Gıssar aýdany Saıód qyshlaǵyna alyp barǵan.

"Úıge kelgen soń ol meniń tólqujatymdy alyp qoıdy. Maǵan bólmeniń bir buryshynan oryn berip, aýlany tártipke keltirýdi jáne úıdiń qabyrǵalaryn túzýleýdi tapsyrdy", - dedi ol.

Ol Saıód qyshlaǵynyń turǵyny Nýmon Mırzoevtiń úıinde ótkizgen segiz aıdy "óte aýyr" dep atady. Oǵan jumysy úshin aqsha tólemedi, durys tamaqtandyrmady, ol óz tólqujatyn sol kúıi kórmegen. Degenmen Nýmon Mırzoev jas jigittiń sózderin joqqa shyǵaryp otyr. Ol Jasýr Amırovtiń úıinde turǵanyn, oǵan tapsyrmalar bergenin rastady. "Biraq men ony kúshpen ustaǵan joqpyn, tólqujatyn tartyp almadym", – degen Mırzoev.

İsti Tájikstan ishki ister mınıstrligi tergep jatyr. Ázirge qylmystyq is qozǵalmaǵan. Amırov Ózbekstan elshiliginen kómek suraýdy kózdep otyr.