«7-20-25. Árbir otbasyna baspana alýdyń jańa múmkindikterin berý» ıpotekalyq turǵyn úı kredıtteý baǵdarlamasyn bekitý týraly Qazaqstan Respýblıkasy Ulttyq Banki Basqarmasynyń 2018 jylǵy 31 mamyrdaǵy № 107 qaýlysymen «7-20-25. Árbir otbasyna baspana alýdyń jańa múmkindikterin berý» ıpotekalyq turǵyn úı kredıtteý baǵdarlamasy (budan ári – Baǵdarlama) bekitildi, dep habarlaıdy Qamshy.kz aqparat agenttigi.
Baǵdarlama Memleket basshysynyń 2018 jylǵy 5 naýryzdaǵy halyqqa arnalǵan «Prezıdenttiń bes áleýmettik bastamasy» úndeýinde aıtylǵan birinshi áleýmettik bastamany iske asyrý sheńberinde ázirlendi.
Atap aıtqanda, ıpotekalyq qaryzdardy syıaqy mólsherlemesi – jyldyq 7%, bastapqy jarna – 20%, qaryz merzimi – 25 jylǵa deıin bolatyn talaptarmen berýdi kózdeıtin «7-20-25» baǵdarlamasyn iske qosý tapsyryldy.
Baǵdarlama ıpotekalyq turǵyn úı qaryzdaryn berýdiń negizgi talaptaryn, qaryz alýshylar men bankterge Baǵdarlamaǵa qatysý úshin ólshemsharttardy, bankterdiń operatormen ózara is-áreket jasaý tártibin, sondaı-aq Baǵdarlamany oıdaǵydaı iske asyrý úshin zańnamalyq aktiler deńgeıinde qabyldanýǵa tıis sharalardy aıqyndaıdy.
Baǵdarlamaǵa Qazaqstan Respýblıkasynyń eńbek jáne (nemese) kásipkerlik qyzmetten alatyn tabysy bar, sondaı-aq menshik quqyǵynda turǵyn úıi joq kez kelgen azamaty qatysa alady.
Baǵdarlamada Qazaqstan Respýblıkasynyń kez kelgen óńirinde bastapqy naryqta turǵyn úı satyp alý úshin mynadaı qun sheginde ıpotekalyq turǵyn úı qaryzyn alý múmkindigi qaralady: 25 mln teńge – Astana, Almaty, Aqtaý jáne Atyraý qalalarynda; 15 mln teńge – basqa óńirlerde. Baǵdarlamanyń operatory Qazaqstan Respýblıkasy Ulttyq Bankiniń enshiles uıymy – «Baspana» ıpotekalyq uıymy» AQ bolyp tabylady.
Operator oblıgasıalardy shyǵarý jáne ornalastyrý esebinen qarjylandyrýdyń naryqtyq tetikterin paıdalana otyryp Qazaqstan qor bırjasyna (KASE) keminde 1 trln teńgeni tartady jáne alynǵan qarajatty Baǵdarlamanyń talaptary boıynsha qatysýshy bankter bergen ıpotekalyq turǵyn úı qaryzdaryn satyp alýǵa jiberedi.
Baǵdarlama sheńberinde qatysýshy bankterge qatysty ólshemsharttar aıqyndalatyn bolady. Qatysýshy bankterdiń tizbesi olar «Baspana» ıpotekalyq uıymy» AQ-pen tıisti sharttar jasasqan soń Qazaqstan Respýblıkasy Ulttyq Bankiniń resmı ınternet-resýrsynda jarıalanady. Baǵdarlamanyń talaptaryna sáıkes qatysýshy bankterdiń qaryzdar berý jáne qyzmet kórsetý úshin qaryz alýshylardan komısıa alýǵa quqyǵy joq.
Qatysýshy bankterdiń qaryzdardy berý rásimderiniń bastalǵany týraly aqparat Qazaqstan Ulttyq Bankiniń ınternet resýrsynda da ornalastyrylatyn bolady.
«7-20-25» baǵdarlamasyn iske asyra bastaýdyń kútiletin merzimi – aǵymdaǵy jyldyń ekinshi jartysy. «7-20-25» Baǵdarlamanyń talaptaryn túsindirý úshin Qazaqstan Ulttyq Bankiniń «QUB «Online» mobıldik qosymshasynda 2018 jylǵy 19 maýsymnan bastap «7-20-25» jańa bólimi iske qosyldy, onda osy Baǵdarlamaǵa qatysty qyzyǵýshylyq týdyratyn suraqtarǵa jedel jaýap alýǵa bolady.
«QUB «Online» mobıldi qosymshasy AppStore jáne PlayMarket dúkenderinde memlekettik jáne orys tilderinde kóshirip alý úshin qoljetimdi. Baǵdarlamamen silteme boıynsha Qazaqstan Respýblıkasy Ulttyq Bankiniń resmı ınternet-resýrsynda tanysýǵa bolady.
