Turǵyn úı qurylys jınaq banki «5-20-15» ıpotekalyq baǵdarlamasynyń sharttaryn daıyndaýǵa kiristi, dep habarlaıdy Qamshy.kz aqparat agenttigi.
Bıylǵy jyldyń naýryz aıynda QR prezıdenti Nursultan Nazarbaev barlyq jumys isteıtin qazaqstandyqqa baspana alýǵa múmkindik beretin "7-20-25" dep atalatyn baǵdarlamasyn iske qosý týraly usynys aıtqan bolatyn. Baǵdarlamanyń sharttary bekitilip, qujattar qabyldaý jóninde talaptar el arasynda qyzý talqyǵa túsip jatyr.
«7-20-25» baǵdarlamasy boıynsha Astana, Almaty, Aqtaý men Atyraýda 25 mıllıon teńgeniń baspanasyn ıpotekaǵa alýǵa bolady. Atalǵan soma - úıdiń shekti baǵasy. Demek, 20 prosent, ıaǵnı 5 mln teńge nesıe alǵan adamnyń alǵashqy jarnasy bolsa, qalǵan 20 mıllıon teńge 25 jylǵa qaryzǵa beriledi. Al basqa aımaqtarda ıpotekaǵa beriletin baspananyń shekti somasy 15 mıllıon teńge (3 mln - alqashqy jarna, al 12 mln - qaryz) dep belgilendi.
Baǵdarlama jarıalanbaı turǵan jyldary halyqtyń basym bóligi óz aqshasyn turǵyn-úı jınaq júıesine kóptep sala bastady. Ipotekalyq naryqtyń álsirep qalǵany da sodan. Oǵan qosa, úleskerlik qurylysqa qatysty zańnama da kúsheıtildi. Bunyń barlyǵy stagnasıaǵa ákelip soqtyrdy. Al turǵyn úı qurylys jınaq júıesine qatysatyndardyń sany kúrt ósti. Sońǵy úsh jyldyń ishinde atalǵan júıe naryqtyń 77 prosentin alyp qoıdy.
Endi, «7-20-25» ıpotekalyq baǵdarlamasynyń kelýimen atalǵan kórsetkish ózgerýi ábden múmkin. Ony Turǵyn úı qurylys jınaq banki de sezip otyr. Sodan bolar,«5-20-15» sharttaryn ázirleýge kiristi. Bul eki baǵdarlamanyń arasynda báseke qyza tússe, halyqqa arnalǵan qolaıly sharttar jasalyp, naryqta oıyp oryn alatyny anyq.
