Balasyndaı qazaqqa bir atanyń,

Qaıǵy-muńsyz atty ma, myna tańym?

«Myń asqanǵa bir tosqan...»-dep kúbirlep,

Ár tań saıyn ózimdi jubatamyn.

Ár qazaqtyń basynda osy oı bar ma,

Senim qalmaı ishtegi bos aıbarǵa...

Keler aıǵa taǵy úmit artamyz ba?

Úmit bolmaı qalǵanda osy aılarǵa.

Dál osylaı qazaqta kún ótýde,

Dál osylaı qazaqta tún ótýde...

Kim senimin joǵaltty amalsyzdan,

Kim mıyna taǵy úmit túnetýde?..

Taqyldaǵan qur sózge tańdaıy tek,

Dep qaı kezde aıtyp ek: «mańdaı ult ek!»

Aldanýdan eshqashan sharshamaıtyn

Aıtyńdarshy, ıtjandy qandaı ult ek?..

Barlyǵyn da suratpaı bere berer,

Tuıaq serippeı ún-túnsiz óle berer...

Shynymenen ıtjandy ult boldyq pa,

Qandaı qorlyq, mazaqqa kóne berer?

Kóne berer qandaı bir ıt qorlyqqa,

Aǵaıynnan alystap syrt qondyq pa?

Qaıan qazaq, qaıtalap taǵy aıtamyn:

Shynymenen ıtjandy ult boldyq pa?..

Jumash Kókbóri