Qazaqstan Prezıdenti Nursultan Nazarbaev Astanany salý kúlli qazaqstandyqtardyń eńbegi ekendigin aıtty. Nazarbaevtyń suhbatynan úzindini Aqordanyń Instagram-daǵy paraqshasy jarıalady.
«Biz Qazaqstandy, elordamyz – Astanany saldyq. Bul kúlli qazaqstandyqtardyń eńbegi. Bul qazaqstandyqtardyń bolashaqqa degen senimi boldy. Sondyqtan da men osy ıdeıany qoldaǵan barlyqtaryńyzǵa alǵys aıtamyn. Biz jańa elordamyzdy sala aldyq, endi onyń 20 jyldyq mereıtoıyn atap ótemiz. Barlyq astanalyqtarǵa jaqsylyq pen bereke-birlik tileımin», - dedi Elbasy.
Búgin elimizdiń elordasy – Astananyń týǵan kúni. Búgin Qazaqstan halqy Astana qalasynyń 20 jyldyǵyn atap ótedi.
1994 jyly 6 shildede QR Joǵary Keńesinde el astanasyn Almatydan Aqmola qalasyna kóshirý týraly sheshim qabyldandy. Resmı túrde elorda Almatydan Aqmola qalasyna 1997 jyly 10-shy jeltoqsanda kóshirildi. Prezıdent Jarlyǵymen 1998 jyldyń 6 mamyrynda Aqmola qalasynyń aty Astana dep ózgertildi.
Memlekettik deńgeıde Astana kúni 2009 jyldan beri atalyp ótip keledi.
