Japonıada sý tasqyny saldarynan 100 adam kóz jumdy, 50 adam iz-tússiz joǵalyp ketti, dep habarlaıdy Qamshy.kz aqparat agenttigi. Sý deńgeıi jyldam kóterilgeni sonshalyq keıbir adamdar úıinen shyǵyp úlgermegen. Keıbiri úıindiniń astynda qalǵan.
Júzdegen úı sýdyń astynda qaldy. Bir jarym mıllıon turǵynǵa úılerinen jyraq jaqqa ketýge buıryq berildi. Úsh mıllıon adam evakýasıalandy.
«Biz buryn-sońdy mundaı jańbyrdy kórgen emespiz» deıdi Japonıanyń meteorologıalyq agenttik ókili.
Japonıa úkimeti tótenshe jaǵdaı boıynsha tótenshe shtab qurdy. 54 myń qutqarýshy, órt sóndirýshi, áskerıler men polıseı sý tasqynynan eń kóp zardap shekken eldiń ońtústik-shyǵys bóligine jiberildi.
Aıta keteıik, jańbyr ótken aptanyń sońynda bastalǵan. Qazir kóptegen aýdandarda jańbyr toqtady. Sý tartylyp jatyr. Juma kúni poıyzdardyń jumysy jartylaı qalpyna keltirildi, alaıda Japonıanyń kóp jerinde sý tasqyny júrýi múmkin degen qaýip bar.
Sıkoký aralynda jańbyrdyń deńgeıi 300 mm jetedi dep kútilýde. Al Tokıodan 600 shyqyrym jerde ornalasqan Motoıama qalasynda jumadan senbige qaraǵan túni 583 mm sý jınalǵan.
Japonıa bıligi aýa raıyn jiti baqylap, turǵyndarǵa aldyn ala eskertip otyrsa da elde bıik ǵımarat pen taýly aımaqtarda turǵyn úı kóp bolǵandyqtan kez kelgen tótenshe jaǵdaıdyń arty úlken tragedıaǵa aınalýy múmkin.
Sarapshylar mundaı jaǵdaıdyń ornaýyna soǵystan keıin júrgizilgen saıasat kináli ekenin aıtady. Sebebi ormandardy joıýǵa ruqsat berilgen. Jańa aǵashtar otyrǵyzylǵanymen olardyń tamyry sý tasqyny kezinde jer qyrtysyn ustap qalýǵa qaýqarsyz.
