Býrabaıda shańǵy tramplıny paıdalanýǵa berildi, dep jazady Qamshy.kz aqparat agenttigi tilshisi. Atalǵan aımaqta shańǵy bazasy sáýir aıynda ashylǵan bolatyn.
Búgin Shýchınsk qalasynda «Býrabaı» atty jańa tramplınniń ashylý saltanaty ótip, oǵan Elbasy arnaıy qatysty. Prezıdent shańǵy bazasynan ózge eki keshendi aralady. Aqmola oblysy Býrabaı aýdanynda kópten kútken shańǵy bazasynyń qoldanysqa berilý saltanatynda prezıdentpen birge vıse premer Asqar Mámın, Mádenıet jáne sport mınıstri Arystanbek Muhamedıuly, Aqmola oblysy ákimi Málim Mýrzalın boldy. Jańadan ashylǵan tramplınde shańǵyshylar prezıdent aldynda sekirip, ónerlerin kórsetti. Jańa respýblıkalyq shańǵy sporty bazasynda shańǵy jarystary, bıatlon, shańǵy-roller sporty boıynsha jattyǵýlar men halyqaralyq jarystar ótkizý josparlanǵan.
Ashylýda joba týraly «Elimizdiń jer baılyǵyn kóbeıtip, onyń ádemiligin halyqqa kórsetý kerek. Qazaqstannyń jeri ánsheıin jatqan dala emes, neshe túrli keremet demalatyn jerler bar ekenin kórseteıik. Onyń ústine Astana irgesindegi Býrabaıda neshe túrli sharalar ótkiziletin bolady, soǵan jaǵdaı jasaıyq. Munyń barlyǵy ákimshiliktiń qaraýynda. Týrısik jerlerdi kóbeıtip, baǵasyn qoljetimdi etip qoıý kerek. Áli de atqarylatyn jumys kóp. Týrızmdi – ekonomıkanyń bir salasy retinde qaraýymyz kerek. Bizge Reseıden, Orta Azıadan týrıser kóptep keledi. Elimizge keletin týrıserdiń sanyn úsh mıllıonnan on mıllıonǵa arttyratyn bolsaq, odan túsetin qarjy 8 paıyzǵa artady», degen Elbasy ár aımaqtyń ákimderine birshama jumystar tapsyrdy.
Elbasy Býrabaı demalys aımaǵynda qandaı jumystar jasalý qajettigine toqtaldy. «Býrabaıda jasalatyn birinshi másele – ishki ınfraqurylymyn jumystaryn bitirý. Sebebi, biz syrtqy jumystardy aıaqtadyq. Ol úshin tıisti jumystardy júrgizdik. Astanadan Býrabaıǵa avto jáne temirjol salyndy. Kókshetaýdyń aeroporty jóndeldi. Endi ishtegi ınfraqurylymdy qolǵa alý kerek. Eger biz barlyq obektilerge sý tartyp, elektr júıeleri men káris júıesin ákeletin bolsaq, memleket týrızmdi damytady. Ony memleketten basqa eshkim salmaıdy. Sonda ınvestorlardyń kelýine múmkinshilik jasalady», - dedi ol. «Sondyqtan meniń tapsyrmam boıynsha memleket tarapynan 2023 jylǵa deıin (týrızmdi damytý boıynsha avtor) besjyldyq baǵdarlama qabyldandy. Men onyń oryndalý joldaryn qazir tyńdadym. Úkimet pen mınıstrlik ókili, oblystyń ákimi ne istep jatqanyn kórdik. Bul jumysty biz bitirýimiz kerek», - dedi Elbasy sózinde.
Qysqy sport túrimen aınalysatyn atletter munda jyl boıy jattyǵý ótkize alady. Sport kesheni shartty túrde shańǵy bazasy dep atalǵanymen, munda tramplın, bıatlon, shańǵydan halyqaralyq deńgeıdegi jarystardy ótkizýge bolady. Munda 2 tuǵyr bar. Bireýiniń bıiktigi – 125, ekinshisi – 90 metr. Tramplınniń jalpy aýmaǵy 125,54 ga jerdi qurady. Obekt eki qurylys nysanynan turady: 1) Jalpy kólemi 111 ga jerdi quraıtyn shańǵy sport bazasy; 2) Shańǵy tramplıni. Memlekettik saraptama qorytyndysyna sáıkes, qurylys jumystaryna búdjetten 38,5 mıllıard teńge kóleminde qarjy jumsaldy.
Nysan teńiz deńgeıinen 430 metr bıiktikte ornalasqan. Merdiger kompanıanyń ókilderi barlyq halyqaralyq talap saqtalǵanyn aıtady. Qurylys kompanıasynyń dırektory Mırko Gornıktyń aıtýynsha shańǵyshylar keshe ǵana tramplınnen sekirip kórdi. Ol – 125 metr. Nysannyń qurylysyn Halyqaralyq shańǵy federasıasy joǵary baǵalap otyr. Tramplın salynǵan aımaqta jeldiń jyldamdyǵy sekýndyna 3 metrden aspaýy kerek.
Eske sala keter bolsaq, bul Qazaqstandaǵy ekinshi shańǵy tramplıny. Buǵan deıin Azıada oıyndary úshin Almatyda shańǵy tramplıny ashylǵan bolatyn.
