Almatynyń qaq ortasynda, dálirek aıtsaq, "Atakent" ortalyǵynyń aldynda bıiktigi 12 metr tıinniń músini ornatyldy. Oǵan 23 mıllıon teńge jumsalǵan. Onyń 15 mıllıony memleket búdjetinen bólingen. Qazaqstan azamattary bul qarjyny halyq úshin áldeqaıda paıdaly dúnıege jumsaýǵa bolatynyn aıtyp, narazylyq bildirip jatyr. Ekonomıserdiń aıtýynsha, 15 mıllıon eldiń kem-ketigin toltyrýǵa jetińkiremeıdi, dese de keıbir máselelerdi sheshýge septigin tıgizer edi, dep jazady Qamshy.kz aqparat agenttigi.

Ekonomıka ǵylymdarynyń doktory Atamurat Shámenov: "15 mıllıon pedofılıa, urlyq-qarlyq, zorlyq-zombylyq sekildi qylmystardyń aldyn alar edi", — deıdi.

-15 mıllıondy, tıinniń músinin ornatýdan bólek, ózge de kóptegen mańyzdy nárselerge jumsaýǵa bolar edi. Jamaıtyn jyrtyǵymyz barshylyq. Máselen, halyqtyń qaýipsizdigi. Qazir elde urlyq, zorlyq, pedofılıa máselesi órship turǵandyqtan, kósheler men ǵımarattardaǵy beınekameralardyń sanyn arttyrý kerek. Ony elıtaly aýdandarǵa emes, qylmys kóp bolatyn, kópbalaly otbasylar turatyn aýdandarǵa ornatý kerek, — deıdi ekonomıs.

Qazirgi naryq zamanynda 15 mıllıon az da emes, kóp te emes. Bul qarajatqa jańa aýrýhana salý múmkin bolmasa da, Almaty shetindegi, aýyl kóshelerindegi joldy jóndeýge bolar edi. Qala kósheleri jyl saıyn jóndeýden ótse de, qala sheti nazardan tys qalyp jatady. Aýyl kóshelerinde jazda shańǵa oranyp, jańbyrly kúni aıaǵyńdy balshyqtan alyp júre almaısyń. Bul — bir.

Ekinshiden, qazir aýyr dertke shaldyqqan, alaıda onyń emine qarjy taba almaı sharq uryp júrgender kóp. 15 mıllıon memlekettiń basty baılyǵy – adam ómirin saqtap qalýǵa kómekteser edi.

Úshinshiden, 15 mıllıon jańa aýrýhana salýǵa jetpese de, aýrýhanany kúrdeli jóndeýden ótkizýge jetedi. Máselen, menıngıt aýrýy órship turǵanda jurttyń jaǵasyn ustatqan Qaskeleńdegi juqpaly aýrýlar emhanasyn bir jańartyp alýǵa bolar edi.

Tórtinshiden, 15 mıllıon teńge kópbalaly, jalǵyzbasty analarǵa Almatydan kólemi 56 sharshy metr eki bólmeli páter alyp berýge jetedi.