«Almatyda ıne salatyn qandaı myqty maman bar?» dep feısbýkte jazǵanym esimde. Áriptesim Meırambek Taýbaldıev «Osy kisi anamdy emdedi. Bir jyldan asty «aýyrdym» degen emes» dep Qurmanbek myrzanyń nómirin jazyp jiberdi. Meniń Qurmanbek Aımolda myrzamen tanystyǵym osylaı bastaldy. Aq halatty kıgen abzal jannyń shyn mánisindegi janashyrlyǵyna, aýzyn ashsa júregi kórinetin meıirimdiligine tánti bolǵanym sonshalyq qalaı «aǵalap» ketkenimdi baıqamadym. Qurmanbek aǵamdy izdep búgin taǵy «Shıpamed» dástúrli qytaı medısına ortalyǵyna bardym. Bir aı buryn emin-erkin kirip, tolǵantyp júrgen suraqtarymnyń jaýabyn alyp júrgen men aǵamen ońasha otyryp suhbat ala almadym, ókinishke qaraı. Dálizde dárigerdiń keńesin alamyn dep otyrǵan aýrý-syrqaýdyń sany óte kóp. Jasy da, balasy da, kárisi de bar. Ýaqytym beker ótpesin dep kezek kútip sarǵaıyp otyrǵan adamdarmen tildese bastadym.

«Sómkem qala bersin osynda. Men temeki shegip keleıin» dedi bir kisi. Ań-tańmyn. Dıagnozyn estýden, dárigerge qaralýdan sharshaǵan naýqastardyń arasynda kóńil-kúıi erekshe jadyrańqy adam eken. Esimin keıinirek bildim. Qaraǵandydan at terletip kelgen Saǵyndyq degen myrza. Omyrtqaaralyq dıskiniń jaryǵynan otyrsa da, jatsa da beli aýyryp, aqyr aıaǵynda júre almaı qalǵan qaraǵandylyq azamat 8 jetiniń ishinde dertinen qulan taza aıyqqanyn maqtanyshpen aıtyp berdi. «Massaj aldym, ıne saldy. 50 jasymda, mine, jas jigitteı shaýyp júrmin» deı otyra «Sender, jastar, kompúter men sotkaǵa jarmasyp ómir súresińder. Az qımyldaısyńdar. Sodan bolar aýrý-syrqaýsyńdar» dep synap alýdy jón kórdi. Aıtqany ras-aý...

«Almaty qalasynyń turǵynymyn. 2009 jyldan beri sozylmaly ótkir pankreatıtpen alysyp kelemin. Aýrýym ýshyǵyp ketkeni sonshalyq, tamaq jeı almaımyn. Muny «prıstýp» dep ataıdy. Eki aılap dám tatpaǵan kezderim boldy. Jeımin de qusamyn. 93 keliden 65 kelige biraq tústim. Jedel járdemmen 12 qalalyq aýrýhanaǵa túskende maǵan tósek-oryn bólip, jatqyzyp emdeýden bas tartty. Sóıtsem, gastroenterologıa bólimi aqyly eken. «Jatyp emdelý quqyǵynan nelikten aıyryp jatyrsyzdar? Jaýaptaryńyzdy qaǵazǵa túsirińizder» degenimde ǵana em alý mártebesine ıe boldym. «Seniń «prıstýptaryń» óttegi eki tastan. Ota jasap, alyp tastaımyz» dep úmit syılady. Alaıda ota jasaldy, tas alyndy, «prıstýptar» jalǵasa berdi. Tanystarymnan «Shıpamedtegi» Qurmanbek myrza jaıly estidim. «Osy dárigerden qaıyr bolmasa, endi ne isterimdi bilmedim» dep úmit pen kúdik arqalap dárigerge kelgende eńsem kóterildi. Ine saldyrtyp, sıstema alyp, shóp dári iship júrgenime bir aptadaı boldy. Allaǵa shúkir, «prıstýpym» toqtady. Tamaq iship júrmin», - dep syr aqtardy Serik Qasymov.

«Shıpamedtiń» basqa klınıkalardan ereksheligi – alystan kelgen adam sol jerde jatyp-aq em ala alady eken. Bylaısha aıtqanda qalanyń kúıbeń tirshiliginen demalasyń ári qajetti em alasyń. Emdelýshilerdiń qatarynda aqyn Muhtar Shahanov baryn bilgenimde tańqalysymdy jasyrmadym. Keshe ǵana 76 jasqa kelgen adýyndy aqynmen júzdesip, amandyq-saýlyq suraýdyń múmkindigi týdy.

«Jazıra qyzym, kel, otyr» dep qolyma órik ustatty. Shahanovsha aıtsam, adamdy jyndy qylýdyń eń ońaı túri televızor eken. «Mynany kúndiz-túni kórgen adam eseńgirep qalady. Kók jáshikti qosqanyma bir-eki kún boldy. Masqara ǵoı» dep renishin aıtqan aqyn meni kórip qýanǵandaı boldy. Jan-jaǵyma qarasam, jıhazy talǵammen qoıylǵan, aýasy keń, kólemi jaǵynan ortasha bólme. «Myna alergıa degen bále boldy. Osynda jatyp ıne saldyrtyp júrmin» dedi Muhtar aǵa. «Shıpamedtiń» tórinde Qurmanbek aǵanyń sizben túsken fotosy ramkaǵa salynyp, ilinip tur. Osyǵan deıin de bul jaqta emdelip pe edińiz?» degenge aqyn tańdandy. «Bir kezdesýde túsirilgen sýret bolýy kerek. «Shıpamedke» kelýim birinshi ret. Ine salatyn jaqsy mamandardy bilemin. Biraq myna dáriger erekshe unap jatyr» dep búkpesiz shyndyǵyn jaıyp saldy. Muhtar aǵa, nesin jasyraıyn, kóp nárseni tilge tıek etti. Biraq ol basqa maqalanyń ózegi bolsa kerek...

Qurmanbek aǵa kabınetinen shyǵyp, massaj jasaıtyn kabınetke bara jatyr eken. "Maǵan qoıar suraǵyń bolsa, qoıa ǵoı" dedi. Kelesi kabınetke jetkenshe bir suraqtyń ǵana jaýabyn áreń  ala aldym. «1977 jylǵymyn. Qytaıdyń Úrimshi qalasynda dúnıege kelgenmin. Beıjińniń «Ine-pyshaq» akademıasyn oqyp bitirdim. 2006 jyly elge kóship keldim» dep tarqatyp aıta bastaǵanda «jaǵdaıy aýyr eki naýqasqa ıne salý kerek» dep kómekshileri sózimizdi bóldi. Maqala eshqaıda qashyp ketpeıdi degen oımen dárigerdiń óz paryzyn oryndaýǵa tezirek kóshkenin qaladym.

Anda-mynda sandaltyp, qyryq bes saraptama jasatqyzyp, aqyr aıaǵynda qate dıagnoz qoıyp, em jazyp bere almaı sharshatatyn zamanda dárigerge baryp kórinýden júreksinetin boldym. Olardyń qataldyǵynan, daýsyn kóterip óktem sóıleýinen, áldeneńe, áldekimge asyǵyp otyrýynan shoshısyń. Osyndaıda Qurmanbek aǵamnyń qazaqılyǵyna qaıran qalasyń. Baldaqqa súıengen ata-ájelerdi qushaq jaıa qarsy alýynan, «apa-aý» dep dıalog bastaýynan tektiligi men mádenıettiligine rıza bolasyń.  Bizdiń qazekeńe dáriden buryn jyly sóz kerek-aý degen oıǵa shomdym da aıaldamaǵa tarttym. Erteń taǵy «Shıpamedke» baramyn...