1 shildeden bastap elimizde barlyq medısına uıymdarynda MKABJ engizý bastalady.
Júıeniń ereksheligi týraly Áleýmettik medısınalyq saqtandyrý qorynan surap kórgen edik.
Memleket basshysynyń mindetti áleýmettik medısınalyq saqtandyrý júıesiniń tıimdiligin arttyrý jónindegi tapsyrmasy aıasynda densaýlyq saqtaý salasynda Medısınalyq kómekti tóleýdiń biryńǵaı júıesi (MKTBJ) engizile bastady. Jańa sıfrlyq qural tegin medısınalyq kómektiń kepildik berilgen kólemi (TMKKK) jáne mindetti áleýmettik medısınalyq saqtandyrý (MÁMS) aıasynda kórsetiletin medısınalyq qyzmetterdiń sapasy men qarjylandyrylýyn baqylaýǵa múmkindik beredi, - dep jaýap berdi Áleýmettik medısınalyq saqtandyrý qory redaksıanyń resmı saýalyna.
Bıyl naýryz aıynda biryńǵaı tólem júıesiniń pılottyq jobasy Aqmola oblysyndaǵy medısınalyq uıymdarda iske qosyldy.
Al 1 shildeden bastap bul júıe elimizdiń barlyq medısına uıymdarynda engiziledi.
Jańa sıfrlyq júıe arqyly:
- kórsetilgen medısınalyq kómektiń negizdiligin úzdiksiz baqylaý jáne derbes esepke alý negizinde medısınalyq qyzmetterdiń ashyqtyǵy qamtamasyz etiledi;
- negizsiz tólemderdi joıýǵa jáne medısınalyq qyzmetterdiń sapasyn baqylaýdy kúsheıtýge bolady;
- medısınalyq kómekti kórsetý kezindegi qatelikter men zańbuzýshylyqtar, sonyń ishinde "jalǵan kórsetilimder" avtomatty túrde anyqtalady;
- medısınalyq qyzmetter úshin tek naqty kórsetilgen kómekke ǵana tólem júrgiziletinine kepildik beriledi.
Atalǵan júıeler qarjyny tıimdi paıdalaný, jalǵan málimetterdi boldyrmaý jáne sybaılas jemqorlyq táýekelderin azaıtýǵa baǵyttalǵan.
Medısınalyq qyzmetterdiń sapasyn baqylaýdyń avtomattandyrylǵan júıesi medısına uıymdaryn pasıentterdiń naqty qajettilikterine beıimdelýge yntalandyrady.
Aqmola oblysyndaǵy pılottyq joba nátıjeleri jańa júıeniń tıimdiligin rastady. Pılottyq rejımniń ózinde-aq júıe 11 myńnan astam medısınalyq kómektiń bekitilgen standarttarǵa sáıkes kelmeıtin deregin, sonyń ishinde jalǵan jazbalardy anyqtady. Anyqtalǵan zańbuzýshylyqtar boıynsha uıymdastyrýshylyq jáne qarjylyq sharalar qabyldanady. Bul jańashyldyqtyń arqasynda medısınalyq qyzmetterdi qarjylandyrý ádiletti ári tıimdirek bolady, al pasıentter sapaly ári ýaqtyly em alýǵa úmittene alady, - dedi qor.
