Elordada áıelder densaýlyǵy, kontrasepsıa jáne qoǵamnyń áıelderdiń reprodýktıvti quqyqtary týraly habardarlyǵyn arttyrý máselelerine arnalǵan ashyq talqylaý ótti.
İs-sharany Qazaqstannyń barlyq aımaqtarynda jumys isteıtin eń iri farmasevtıkalyq kompanıalardyń biri bolyp tabylatyn Gedeon Richter Kazakhstan kompanıasy Kazakhstan Women’s Health jobasy aıasynda uıymdastyrdy. Jıyn QR Prezıdenti janyndaǵy Áıelder isteri jáne otbasylyq-demografıalyq saıasat jónindegi ulttyq komısıanyń múshesi Nazym Janǵazınova júrgizýimen ótti.
Kezdesýde qoǵam nazarynan tys qalyp júrgen taqyryptar ashyq talqylandy. Joǵary sanatty akýsher-gınekolog, medısına ǵylymdarynyń doktory Aınur Tóletova keń taralǵan gınekologıalyq aýrýlar, jynystyq jolmen beriletin ınfeksıalar, zamanaýı kontrasepsıa ádisteri jáne jasóspirimderdiń jynystyq tárbıesiniń mańyzy týraly tyń aqparattarymen bólisti.
Aınur Tóletova baıandamasynda jedel kontrasepsıa preparaty bedeýlikke ákelip soqtyrady degen pikirge qatysty túsinik berdi.
- "Jedel kontrasepsıa preparattary urpaq órbitý qabiletine áser etpeıdi. Olardyń áser etý mehanızmi ýaqytsha jáne reprodýktıvti júıege zıan keltirmeıdi. Bul - ǵylymı dáleldengen fakt. Preparattar ovýlásıany nemese uryqtanýdy boldyrmaıdy. Biraq júkti bolǵan jaǵdaıdy úzbeıdi. Kontrasepsıa – bul densaýlyqqa qaýip emes, kerisinshe, kúrdeli jaǵdaılardyń aldyn alý múmkindigi", - deıdi.
Al "Gedeon Rıhter Qazaqstan" kompanıasynyń ókili Dınara Birmaǵanbetova aldaǵy ýaqytta da áıelder densaýlyǵyna qatysty máseleler ashyq talqylanatynyn aıtty.
- Áıelder densaýlyǵy taqyrybynyń ashyq talqylana bastaǵanyna qýanyshtymyz. Áıelder senimdi aqparatqa qol jetkizip, densaýlyǵyna "Áıelder densaýlyǵy taqyrybynyń ashyq talqylana bastaǵanyna qýanyshtymyz. Áıelder senimdi aqparatqa qol jetkizip, densaýlyǵyna qatysty sheshimderdi ýaqytyly qabyldaı alýy óte mańyzdy", - dedi kompanıa ókili.
Sondaı-aq jıynǵa belgili qoǵam qaıratkerleri men medıa tulǵalar qatysty. Olardyń ishinde telejúrgizýshi, jýrnalıs jáne medıamenedjer, «Maryam» qorynyń negizin qalaýshy Láılá Sultanqyzy jáne «Jaqsylyq klýby» qaıyrymdylyq qozǵalysynyń negizin qalaýshy Gúlmıra Abdrasheva qatysyp, túrli qıyn jaǵdaılarǵa tap bolǵan áıelderge kómek kórsetý tájirıbesimen bólisti.
Kezdesý sońynda Láılá Sultanqyzy, Gúlmıra Abdrasheva, Aınur Tóletova jáne Nazym Janǵazınova Kazakhstan Women’s Health jobasynyń ambassadorlary bolyp taǵaıyndaldy.
