Densaýlyq saqtaý mınıstrligi Dárilik saıasat departamentiniń dırektory Jandos Ádilhan eldegi dári-dármek baǵasyna qatysty jaýap berdi.

Aıtýynsha, mınıstrlik baǵa saıasatyna qatysty birqatar jumys atqarýda.

Qazirgi tańda elimizdegi dárilik zattardyń baǵasyn turaqtandyrý boıynsha mınıstrlik birqatar jumystar júrgizildi. 2024 jyldyń sońynda dárilik zattar men medısınalyq buıymdardyń baǵasyn belgileý boıynsha erejelerine tıisti zańnamalyq ózgerister engizildi. Atap aıtqanda, buryndary dárilik zattardyń baǵasyn qalyptastyrý kezinde artyq paıyzdyq ústemaqylar qosylatyn. Iaǵnı kedendik salyq, marketıńtik salyq, tasymaldaýdy qosqanda, "paıyzdyń ústine paıyz" qaǵıdaty qoldanylyp kelgen. Qazirgi tańda mınıstrlik bul eskertýlerdi qolǵa alyp, álemdik halyqaralyq tájirıbe negizinde baǵa saıasatyn turaqtandyrý boıynsha mehanızmdi qalyptastyrdy. Bul degenimiz – dáriniń negizgi baǵasyna artyq shyǵyndardy qosý paıyzy alynyp tastaldy. Bul nege ákeledi? Zaýyttan óndiriletin dárilik zattardyń tutynýshyǵa kelgenge deıingi baǵasyn kótermeı, birqalypty ustap turýǵa qol jetkiziledi, - dep atap ótti vedomstvo ókili.

Sonymen qatar ol tek qana dıstrıbútordiń, bolmasa ózindik shyǵynnyń quny ǵana kórsetiletindigin alǵa tartty.

Birinshiden, halyqqa tıimdi qoljetimdi ári sapaly dárige qol jetkizý maqsaty tur. Ekinshiden, qazirgi tańda kóptegen preparattyń baǵa saıasatyn negizsiz kóterýine baılanysty qosymsha buıryqqa ózgerister engizilip jatyr. Atap aıtsaq, buryndary farmkompanıanyń jáne zaýyttardyń ókilderinde dıstrıbútorlerdiń baǵasyn belgileý boıynsha tirkeý kezinde ǵana baǵa usynylatyn bolsa, qazir eki jylda bir ret mindetti túrde baǵa saıasatyn qaıta tirkeýge mindetteıtin bolamyz. Jańa mehanızm qalyptastyrǵan saıyn burynǵy eski baǵamen bekitilgen dáriler mindetti túrde túsedi dep boljap otyrmyz. Buıryqqa ózgeris engizgennen keıin dári arzandaıdy dep kútýdemiz, - dep jaýap berdi departament basshysy.

Al bıyldan bastap qosymsha qun salyǵynyń artýy dári-dármek baǵasyna qalaı áser etetindigine qatysty suraqqa jaýap berdi.

Qosymsha qun salyǵyna qatysty densaýlyq saqtaý salasynda arnaıy jumys toby bar. Olardyń quramynda Májilis depýtattary, arnaıy bıznes ókilderi qamtylǵan. Dárilik zattardyń baǵasyna qosymsha qun salyǵyn qospaýǵa qatysty birneshe ret talqylaý ótti. Sáıkesinshe, ol dári baǵasynyń qymbattaýyna ákelýine baılanysty ol qaǵıdatty (QQS qosý – red.) ustanbaımyz, - deıdi Jandos Ádilhan.