Almatyda eki avtobýs betpe-bet soǵysyp, jıyrmadan astam jolaýshy zardap shekkenin osyǵan deıin habarlaǵanbyz. Dárigerler onyń beseýin birdeı aýrýhanaǵa jatqyzypty. Tipti, birine shuǵyl ota jasalǵan. Abyroı bolǵanda júrgizýshi ózine qaraı jóńkilip kele jatqan bos avtobýsty kórgende tez es jıyp, ózi basqarǵan qoǵamlyq kóliktiń tumsyǵyn soǵan qaraı burypty. Áıtpese, búıir jaqtan kelip soqqanda adamǵa lyq toly kólik tóńkeriler edi deıdi. Alty jastaǵy baladan seksendegi qarıanyń záresin alǵan jol apat týraly Eýrazıa birinshi arnasy habarlaıdy.
Kúni keshe qalanyń qaq ortasynda bolǵan osy jol apatynan soń on jyl tájirıbesi bar júrgizýshiniń ózi qorqyp qalǵan. Tapa tal túste Abaı dańǵylynan Dostyq dańǵylyna buryla bergeninde ishinde ne adamy, ne tizginshisi joq avtobýsty kórip abdyrap qaldym deıdi. salonda otryǵan kishkentaı balalar esine túskende baryp qana es jınapty. Jolaýshylardy aman alyp qalý úshin avtobýstyń tumsuǵyn týra ekinshisine suǵýǵa týra kelgenin aıtady.
«Ol negizi lob kele jatyr edi. Jolaýshylardyń qaýipsizdigin oılap, ózimdi, buryshty qoıdym. Negizi ár vodıteldiń reaksıasy ózin alyp qashady ǵoı. Ol avtomatıcheskıı da» - deıdi júrgizýshi Berdaly Ryspekov.
Apattan soń, qıraǵan avtobýs ishinen áýeli eki kishkentaıdy izdedim deıdi júrgizýshi. Keıin jedel járdem kelgenshe, jarty saǵattaı terezeden qalǵan jolaýshylardy qutqarypty. Al, dárigerler oqıǵa ornyna on kólik kelip, 21 adamdy aýrýhanaǵa jetkizgenderin aıtady. Onyń úsheýi bala. Al, beseýi birdeı aýrýhanaǵa tósegine tanylǵan. Birine tipti ota jasalypty.
«Negizgi jaraqaty bas mı jaraqaty. Aıaq qol ýshıv. Negizgi dıametri sondaı aıaq qolynyń synǵandary bar. Qazirgi tańda operasıadan keıin arnaıy palataǵa aýystyrylyp jaǵdaıy ońalyp kele jatyr» - deıdi qalalyq densaýlyq saqtaý basqarmasy basshysynyń orynbasary Nurjan Isabekov.
Al, avtopark ókilderi kináni sý jańa avtobýstardan emes, júrgizýshiden kórdi. Óıtkeni, bos kóliktiń qol tejegishin basýdy umytyp, emin-erkin tamaqtanýǵa tastap kete barǵan. Onyń ústine turaqtaýǵa bolmaıtyn jerge qoıǵan. Esikterin bekitip ketipti. Ashyq bolsa, «aqyldy» avtobýstyń qaýipsizdik júıesi iske qosylar edi deıdi.
«Bir júrgizýshini jumystan bosatamyz. onyń taǵdyryn sot sheshetin bolady. al, ekinshi júrgizýshiniń esh kinási joq. al, shaǵymdanǵan turǵyndar bolsa, barlyq shyǵyndy óteýge ázirmiz» - deıdi «AlmatyElektro-Trans» JSHS basshysy Rızvan Sınaev.
Endi bir bálish úshin júrgizýshiniń 30 jyldaı eńbegi qurdymǵa ketýi ábden múmkin. Al, ota jasalǵan naýqas búgin jansaqtaý bóliminen shyǵyp, tilge kelip jatyr.
