Astanada polıseıler qyzmettik kóligimen eki jasóspirimdi qaǵyp ketti. Abyroı bolǵanda eki bala din aman. Biraq, tártip saqshylary balalar jolǵa birden shyǵa keldi dep aqtalmaq bolǵan kórinedi. Alaıda, kýágerler jaǵdaıdyń múlde basqasha bolǵanyn aıtady. Bul oqıǵa onysyz da İshki ister organdaryna ókpesi qara qazandaı halyqtyń jarasyn ashyp jibergendeı kórindi. Onyń ústine búldirshinderdi qaǵyp ketken polıseıler eshqandaı jaýapkershilikke tartylmapty. Jaıbaraqat jumystarynda júr. Bul týraly Qamshy.kz aqparat agenttigi Eýrazıa birinshi arnasy silteme jasap habarlaıdy.
Oqıǵa myna "Astanalyq bazar" mańynda bolǵan. Baǵdarshamnyń jasyl túsi janǵanda, velosıpedine inisin otyrǵyzǵan bala joldan kesip ótpek bolypty. Alaıda myna baǵyttan júıitkip kelgen jol patrúldik polısıasynyń kóligi balalardy kórmedi me, álde baǵdarshamnyń jasyl túsin elemedi me, búldirshindi qaǵyp ketedi.
Ol jerge dereý kósheden ótip bara jatqan jurt jınalyp, balalarǵa kómek kórsetipti. Al polıseıler ózderi qaǵyp ketken 12 jastaǵy jasóspirim men onyń 9 jastaǵy inisin medısınalyq ortalyqqa alyp barmaq bolypty. Kýágerlerdiń sózinshe, balalar odan bas tartqan soń tártip saqshylar óz jónderine ketip qalǵan.
«Kóz aldymda eki adamdy qaǵyp ketti. Bala ǵoı esh kúnási joq. Oqıǵa ornyna adamdar jınalyp jatyr. Ekeýin birdeı qaǵyp ketip jatyr. Eshe oǵan eshkim jaýap bermeıdi. Ne degen jaýapsyzdyq? Sony aıtqym keledi» - deıdi qala turǵyny Danabek.
Jol kólik oqıǵasyna qaramaı, astanalyq polıseıler jumystaryn jalǵastyra bergeni kópshiliktiń ashý-yzasyn týǵyzdy. Belgili saıasattanýshy Erlan Saıyrov tártipke jaýapty saqshylardyń ózi tártipti óreskel buzýy qalypty jaǵdaıǵa aınalyp bara jatqanyn aıtady.
«Olardyń jazasyn shyǵaryp, olarǵa belgili bir qyzmettik sonymen birge quqyqtyq baǵa berilý kerek. Ol baǵa áli berilmegen. Bul árıne quqyq qorǵaý organdaryna qoǵamnyń senimin azaıtpaıdy. Qazirgi tańda qoǵamda múlde senim joq» - deıdi saıasattanýshy Erlan Saıyrov.
Aıta ketsem, bul polıseılerdiń qatysýymen bolyp jatqan alǵashqy oqıǵa emes. Saıasatker kóp jaǵdaıda zańdy belshesinen basyp, qyzmetin jalǵastyra beretin quzyrly organ ókilderi jazaǵa mindetti túrde tartylýy kerek dep sanaıdy.
«Quqyq qorǵaý ókilderi basqa bir zań aıasynda ómir súredi da, bizdiń basqa azamattar barlyǵy zań aıasynda ómir súredi degen nárse bul ádiletti qoǵam formasyna múlde sáıkes kelmeıdi. Sondyqtan olar ózderiniń jazasyn alýy kerek. Ol ákimshilik, qyzmettik jaza bolýy múmkin» - deıdi saıasattanýshy Erlan Saıyrov.
Al jol-kólik oqıǵasy elordalyq polısıanyń beınekameralaryna túsip qalǵan. Alaıda quzyrly organ beınejazbany bermek túgili osy jaǵdaıǵa baılanysty suhbat bergisi kelmedi. Buǵan deıin aqparattyq portaldarǵa jazbasha jaýap bergen İshki ister departamentiniń baspasóz qyzmeti qyzmetkerlerine qatysty endi ǵana tergeý bastalǵanyn habarlady.
