«Reporter» saıtynda «Nado srochno valıt: Rýsskıe begýt ız Kazahstana» atty maqala jaryq kórdi. Ádeıi arandatý úshin jazylǵan maqala ekeni kózge uryp tur. Buǵan deıin de kórshi eldiń jýrnalıseri arandatý maqsatynda túrli maqala men baǵdarlamalar shyǵarǵan. Eń qyzyǵy, atalǵan saıttyń baılanys telefondary, meken-jaıy men qyzmetkerleri týraly aqparat múldem kórsetilmegen. 

Ózge eldiń saıasatyna, ishki máselelerine qol suǵýǵa, bútin bir ulttyń namysyna tıýge, qorlaýǵa eshkimniń de quqyǵy joq. Alaıda bul quqyqty belshesinen basyp júrgen kórshi eldiń jýrnalıseri bul ádetinen tyıylar emes. Mundaı áreket jýrnalısik etıkaǵa da jat ekendigin eskertkimiz keledi.

Sarapshylardyń aıtýynsha, kórshi eldiń arandatýshylyq mándegi ultaralyq qaqtyǵysty týǵyzatyn aqparattyq shabýylyna mán bermeý qajet. «Árbir úrgen ıtke tas alyp júgirýdiń qajet joq» degen pikirdi ustaný kerek deıdi olar.

Dese de maqala astynda jazylǵan pikirler qazaqstandyqtardyń shambaıyna tımeı qoımaıdy. "Qazaqstandaǵy orystar men orys tiliniń quqyǵy shektelip jatyr" dep dabyl qaqqan Shaıanov Andreı Vıktorovıch degen esimmen saıtqa tirkelgen jeli qoldanýshysy separatıstik mándegi pikir qaldyrǵan. Qazaqtardy jek kóretinin jazyp, kishkentaı qazaq balalaryn qorlaǵysy keletinin ashyq túrde aıtady.

Áleýmettik jelide atalmysh maqala men joǵarydaǵy pikir qyzý talqylanyp jatyr. Sebebi Shaıanov Andreı Vıktorovıch Qazaqstandaǵy «Barys» hokeı klýbynyń jattyqtyrýshysy. Shyǵys Qazaqstan oblysynyń týmasy. Onymen qoımaı fotosy da júktelgen.

Mán-jaıdy bilý úshin «Barys» hokeı klýbynyń baspasóz qyzmetine habarlastyq. Evgenıı Akmanov esimdi baspasóz hatshysy Andreı Vıktorovıchtiń klýbpen birge jarysqa Novosıbırskige ketip bara jatqanyn jáne tek 7 tamyzda ǵana elge qaıtatynyn jetkizdi. Eldi dúrliktirmeı máseleniń toq eterin aıtýyn surap, Shaıanovtyń ózimen sóılespek edik, suhbatty bir aptaǵa shegerdi. Onda da jýrnalıserge maqalada jazylǵan pikirge qatysty lám-mım deıtini belgisiz. Halyq qyzý talqylap jatqanda shetkeri qalǵany tańǵaldyrdy. Jol júrip bara jatsa da birneshe mınýtyn bólip máseleniń anyq-qanyǵyn aıtsa el de tynyshtalar edi. 

Baspasóz hatshynyń aıtýynsha, arandatýshy mazmundaǵy pikir qaldyrǵan Shaıanov emes, ózge bireý.

- Bul pikirdi qaldyrǵan Andreı Vıktorovıch emes. Áldebir qaskóıler onyń atynan jazyp otyr. Mundaı jaǵdaı birinshi oryn alyp jatqan joq. Andreı Vıktorovıch quqyq qorǵaý organdaryna shaǵym túsirgen bolatyn. Ol Qazaqstannyń patrıoty. «Barys» klýby úshin talmaı eńbek etip júrgen azamat. Onyń atynan jazylǵan pikirlerge onyń jeke basynyń qatysy joq. Ózimizdiń áleýmettik jelide de onyń atynan bireýler osyndaı pikir qaldyrǵan eken. Biz birden Andreı Vıktorovıchke habar berdik. Ol quqyq qorǵaý organdaryna habarlasty. Ol adamdy tapty ma, tappady ma habarsyzbyn. Sebebi eńbek demalysyna shyǵyp kettim , - deıdi «Barys» hokeı klýbynyń baspasóz qyzmetkeri. 

Jattyqtyrýshy rasymen de shaǵym túsirdi me, ol shaǵymy boıynsha is júrgizilip jatyr ma, onyń nátıjesi qandaı bolǵanyn bilý úshin QR Bas prokýratýranyń baspasóz qyzmetine habarlastyq. Olar búgin suraqtarymyzǵa jaýap bere almaıtynyn aıtady.