Reseıdiń «Energomash» ÚEU dırektory Igor Arbýzov  aýyr klassty zymyran tasyǵysh «Proton-M» qozǵaltqyshtaryn óndirý osy jyldyń sońynda toqtaıdy dep málimdedi, dep habarlaıdy Qamshy.kz aqparat agenttigi reseılik aqparat quraldary taratqan habarǵa súıenip.

«Hrýnıchev atyndaǵy memlekettik ǵylymı-óndiristik ortalyǵymen jasalǵan talap sheńberinde qozǵaltqyshtardy óndirý bıyl Permde toqtatylady. Eger «Proton» zymyrandaryn ushyrýǵa jańa kelisimsharttar bolmasa, kelesi jyldan bastap osy qozǵaltqyshtar shyǵarylmaıdy», - dedi Arbýzov. Alaıda Arbýzov balama qozǵaltqysh qandaı bolatynyn aıtpaǵan.

Jaqynda ǵana «Roskosmos» jańa «Soıýz-5» zymyranyn jasaıtynyn málimdegen. 2022 jylǵa qaraı daıyn bolatyn raketaǵa 61 mıllıard rúbl qarjy bólingen. Dmıtrıı Rogozın Twitter jazbasynda «Energomash» bazasynda zymyran qozǵaltqyshtaryn jasaıtyn korporasıa qurý týraly jazǵan.

Qazaqstan men Reseı arasynda Baıqońyr ǵarysh aılaǵyn jalǵa berý týraly 1994 jylǵy kelisim-shart jasalǵan. Eki eldiń prezıdentteri 2004 jyly ǵarysh aılaǵyn jalǵa berý merzimin 2050 jylǵa deıin uzartqan.  

Ekologtar, belsendiler «Proton» qozǵaltqyshtaryndaǵy geptıl otyny asa zıandy ekenin aıtyp dabyl qaǵyp keledi. 2015 jyly Quzyrly oryndar bergen san boıynsha 130 myńnan astam kıik qyrylyp qaldy. Proton ushatyn Baıqońyrmen kórshiles oblystarda mal qyryldy. Alaıda memleket buny protonnyń zardaby dep resmı tanymady.