Meksıkalyq Saýl "Kanelo" Alvares (49-1-2, 34 KO) LA Times basylymyna bergen suhbatynda ustalyp qalǵan dopıng synaǵy jáne Gennadıı Golovkınmen (38-0-1, 34 KO) teketiresi jaıly áńgimeledi dep habarlaıdy Qamshy.kz aqparat agenttigi tengrinews.kz saıtyna silteme jasap. 2017 jyldyń qyrkúıeginde boksshylar alǵashqy jekpe-jegin T-Mobile arenasynda ótkizip, sol kezdesýde jeńimpaz anyqtalmaǵan edi. 12 raýnd qorytyndysynda esep teń bolyp, arty daýǵa ulasqan edi.

Bir jyldan keıin boksshylar osy rıngte taǵy da kezdesýdi josparlap otyr. Bastapqyda ekinshi kezdesý 5 mamyrda ótedi delingen, alaıda "Kanelo" dopıng synaǵynan óte almaı, shettetilgen edi. Osydan keıin taraptar qyrkúıekte kezdesýge kelisti. 

"Buǵan tipti de ýaıymdamaımyn, - deıdi Alvares ustalǵan dopıng synaǵy jaıly. - Men árdaıym alǵa júrip, ózimniń kim ekenimdi jáne ne istegenimdi anyq bilemin. Árdaıym sabyrly boldym. Ýaqyt óte kele qandaı synaq jaıly aıtylǵany anyqtalady. Menińshe, buǵan bola oılanyp, qymsynatyn jaǵdaı emes. Komısıa meniń qasaqana jasamaǵanymdy biledi, biraq árdaıym erejeni saqtaý qajet".

Alvares ózin alaıaq dep aıyptaǵan Golovkın men onyń bapkeri Abel Sanchestiń málimdemeleri júıkesine ábden tıgenin moıyndady. Biraq bárinen de qatty mazalatqany - GGG-diń tabysty teń bólý týraly talaby eken, sebebi ol dopıng synaǵy qarsańynda 35 paıyzǵa da kelisip turǵan. Aqyry qazaqstandyq 40 paıyzdan asa tabys alatyn boldy. 

"Golovkın aqsha úshin emes, jekpe-jek úshin judyryqtasatynyn málimdeýge sheber. Biraq ol "Aqsha úshin judyryqtaspaımyn" dep alyp, sol úshin ǵana rıngke shyǵatyn boksshy", - dedi "Kanelo". Munymen qatar, meksıkalyq ekinshi kezdesýdi ýaqytynan buryn aıaqtaýǵa bel býyp otyrǵanyn atap ótti.

Aıtýynsha, birinshi kezdesýde ol Golovkınniń denesi men basynan soqqy jasaýmen bolǵan.  "Qalyńdatylǵan qolǵaptan bolyp otyr", - dedi "Kanelo". Basylymnyń málimetinshe, "Kanelo" jattyǵý kezinde qolyn jaraqattap alǵandyqtan osyndaı qolǵap kıgen. Al revanshta ol qalyńdatylmaǵan qolǵappen judyryqtaspaq. "Nokaýtqa túsirýdiń amalyn birinshi raýndtan bastap jasaýǵa nıettemin", - dedi Alvares.