Munaıshylar ereýiliniń tanymal lıderi bolǵan Maqsat Dosmaǵambetovpen qoshtasý Jańaózendegi ózi turatyn úıdiń aýlasynda ótti. Marqummen qoshtasýǵa ol buryn jumys istegen "Ózenmunaıgaz" mekemesiniń munaıshylary ǵana emes, Jańaózendegi barlyq munaı kásiporyndarynyń jumysshylary, qala turǵyndary keldi. Biraq jergilikti bılik pen opozısıa ókilderi baıqalmady.
Munaıshylar kesheden beri Maqsattyń máıitin ortalyq alańǵa aparyp, janazasyn sol jerde shyǵarýdy jáne onyń munaıshylar quqyǵyn qorǵaýdaǵy eńbegin aıtpaqshy bolǵan.
Biraq janazaǵa jınalǵan, aty-jónin aıtpaýdy suraǵan munaıshylardyń birnesheýiniń Azattyqqa aıtýynsha, Dosmaǵambetovtiń týystary janazany alańda nemese qaladaǵy jańa salynǵan "Ábish qoja" meshitinde ótkizýge qarsylyq bildirgen.
Marqumdy Jańaózennen bes kılometrdegi Teńge aýylynyń zıratyna jerledi.
Marqumnyń artynda otbasy, eki uly, bir qyzy qaldy.
Maqsat Dosmaǵambetov 2011 jyly Jańaózende "jappaı tártipsizdikti uıymdastyrýshy" dep tanylyp, alty jylǵa sottalǵan. Qazaqstan sotynyń barlyq apelásıalyq ınstansıalary onyń jazasyn jeńildetýden de, isti qaıta qaraýdan da bas tartqan.
2011 jylǵy Aqtaýdaǵy sotta Maqsat Dosmaǵambetov eń alǵash ret túrmedegi azaptaý týraly ashyq málimdeme jasap, onyń tergelýin talap etti. Onyń aryzynan soń qamaýdaǵy 21 munaıshy sotqa azaptaý týraly shaǵym túsirdi. Sot saraptamasy onyń qabyrǵasynyń, bet jaq súıeginiń synǵanyn anyqtaǵan.
Keıin belsendige bet jaq qaterli isigi degen dıagnoz qoıylǵan. Maqsat Dosmaǵambetov bet súıegindegi onkologıalyq aýrýdyń negizgi sebebin óziniń Jańaózen prokýratýrasy men ýaqytsha qamaý abaqtysyndaǵy tergeýde azaptalǵanynan kóredi. "Jańaózen isi" boıynsha sotta ol óziniń tergeý kezinde azaptalǵanyn aıtqan. Biraq sot ol kezde Dosmaǵambetov pen basqa da sottalýshylardyń azaptaýǵa qatysty shaǵymdaryn "bos sóz" dep qabyldamaı qoıǵan.
