Taǵy da Pavlodar oblysynyń bas ıdeology Meıram Begentaev myrzanyń nazaryna!

Pavlodar oblysy ákimi apparaty «Qoǵamdyq kelisim» komýnaldyq memlekettik mekemesinde Qarttar kúnine oraı dastarhan jaıylyp, mádenı shara ótkizildi (02.10. 2018). Ókinishke qaraı, sharany júrgizýshi aldaǵy 29 qazan kúni komsomol uıymynyń 100 jyldyq mereıtoıy atalyp ótiletinin asqaq pafospen aıtyp, qarttardyń jas kezinde komsomol bolǵanyn esterine saldy! İle ánshiler tobyna qosylyp «Komsomolsy - dobrovolsy» ánin shyrqady!
Qazirgi bizdiń qazaqstandyq qoǵamda lenınızm ilimi, kompartıa ıdeologıasy qoldanylmaıdy, komsomol uıymynyń ornyna QR Prezıdenti N.Á. Nazarbaevtyń jarlyǵymen jasóspirimderdiń «Jas ulan» uıymy jáne «Nur Otan» partıasynyń jastar qanaty qurylǵan. Qyzyl ımperıanyń memlekettik rámizderi men ánuranynyń ornyna Egemen Qazaqstannyń rámizderi men ánurany qabyldanǵan. Demek, olardy elemeı memlekettik mekemede keńestik dáýirdi, komýnıstik qoǵamdy dáripteıtin án salyp, kompartıa atrıbýttaryn jarnamalaý saıası qatelik bolyp tabylady.
Bul máseleni áleýmettik jeliler arqyly ózińizdiń nazaryńyzǵa usynǵanbyz, BAQ arqyly da kótergenbiz. Áıtse de, esh nátıje joq! Oblystyq G.N. Potanın atyndaǵy tarıhı-ólketaný mýzeıindegi oqıǵanyń izi sýymaı jatyp, oblys ákimi apparaty «Qoǵamdyq kelisim» komýnaldyq memlekettik mekemesinde dál soǵan uqsas oqıǵa oryn aldy! 
Sizdiń qaramaǵyńyzdaǵy keńestik qoǵamdy qımaıtyn qyzmetkerler memlekettik mekemelerde óz kózqarasyna sáıkes álgindeı is-sharalardy talǵaýsyz ótkize beretin bolsa, Elbasymyzdyń «Rýhanı jańǵyrý» baǵdarlamasyn qalaı júzege asyramyz? Aramyzda keshe kúırep qalǵan Keńes odaǵyn kókseıtinder júrgeninde Elbasymyz mejelegen Máńgilik elge qalaı aınalamyz? 
Meni osyndaı oılar mazalaıdy. Sizdi she?..