Álemde árkim óz isimen aınalysyp úırengen. Temir ustasy – temir jonady, baǵban – baý-baqsha isimen shuǵyldanady. Sondyqtan da barlyq elde óz isiniń mamany bolýǵa úıretetin túrli oqý oryndary ashylyp, «sen myna maman ıesisiń» dep qolyna qalpaqtaı dıplomdaryn ustatady. Iaǵnı, kez kelgen adam belgili bir mamandyq ıesi. Máselen, bilim berý salasynda bazalyq bilimiń sáıkes kelmese, myń jerden sen sol salany tereń meńgerseń de, turaqtap jumys isteı almaısyń. Kelgen komısıa «mamandyǵy sáıkes kelmeıdi eken» dep, aldymen saǵan shúılige bastaıdy. Memlekettik qyzmette de solaı. Qyzmetke qabyldaý salaǵa qabilettiligińdi tekserip, test tapsyrý túrinde anyqtalady. Jýrnalıser de úsh aılyq synaq merziminen ótpeı buqaralyq aqparat quraldaryna qyzmetke qabyldana almaıdy. Tipti, sahnada el yqylasyna bólenip júrgen maman akterdiń ózi de kınoǵa túsetin bolsa, mindetti túrde synaq kastınginen ótedi.
Dál osyndaı talap tek ánshilerge ǵana qatysy joq-aý dep oılaısyń keıde. Óıtkeni, serıaldar men kınofılmderde qolynda álgindeı «akter» degen dıplomy bar ártisterden góri ánshilerdi kóbirek kóresiń. Janar Aıjanova, Móldir Áýelbekova, Jazıra men Janbolat, Kámshat Joldybaeva, Aıqyn Tólepbergen, Dastan Orazbekov, Janar Duǵalova, Jiger Aýypbaev... osylaı kete beredi. Tipti, barlyq serıaldarǵa qatysyp, ekrannan túspeı, «jaýyr» bolǵan ánshiler de bar. Bálkim, keıbiriniń akterlik mamandyǵy da bar shyǵar, biraq biz olardy ánshi retinde jaqsy tanyp qalǵanbyz (árıne, keıbiriniń akterlik qabiletine tań qalmaı tura almaımyz).
Máselen, ulttyq kıno ónerimizdiń jaýharlaryna aınalǵan «Qyz Jibek», «Gaýhartas», «Atamannyń aqyry», «Meniń atym Qoja» fılmderinen kınoǵa túsken birde-bir ánshini tappaısyz. Ánshiler tek ártister salǵan ánderge ǵana kadr syrtynan dýbláj jasaıdy.
Sonda kıno ındýstrıasyndaǵy mamandarǵa fılmderine túsý úshin kásipqoı akterlerden góri ánshilerdiń tıimdi bolǵany ma? Joq, álde, odan da tanymal bola túsý úshin onsyz da «juldyz aýrýymen» aýyryp júrgen ánshilerdiń ózderi kınoǵa túsýge surana ma? Munyń basqadaı da bir sebepteri bar shyǵar? Biz bilmedik...
Bekjigit Serdáliniń feısbýk paraqshasynan
