Alıment óndire almaǵan otaǵasy. Almaty oblysynda 4 birdeı kámeletke tolmaǵan balasyn ózi tárbıelep otyrǵan erkek 5 jyl buryn tastap ketken áıelinen alıment ala almaı otyr. Qazirdiń ózinde, "kókek ananyń" bereshegi 2 mıllıon teńgege jetken eken. Alaıda, sot sheshimi bola tura baýyr eti balalaryna bir tıyn da bermegen kórinedi. Bul týraly Eýrazıa birinshi arnasy habarlaıdy.
Anasyna hat joldap otyrǵan bul búldirshinder ony sońǵy ret qashan kórgenderin umytqan. Saǵynǵannan bolar, jıi tústerinde kóretinderin aıtady. Qazir 4 birdeı balany ákesi men ájesi baǵyp otyr. Ana jylýyn bere almasaq ta, qatarynan qaldyrmaı, ósirip kelemiz, deıdi. Ul-qyzynyń iship-jemine jaýapty otaǵasy kezekti ret jumys izdep ketken eken.
«4 jyldan mine 7 aı asty joq bolǵanyna. Basynda jumys istep, tabys taýyp kelem depti. Bul kúıeýine aıtqany» - deıdi Aqyn Sara aýylynyń turǵyny Orynbasar Saýryqova.
İni-qaryndastaryna bas-kóz bop otyrǵan úıdiń úlkeni 8-synypta oqıdy. Anasyn saǵynǵanmen, renish pen ókpesi qara qazandaı. Sol sebepti, ol týraly aıtqysy joq.
«Úıdegi sharýalar, odan keıin sýret salam bos bolsam, úı jınaımyn. Álıa men Nurtastyń sabaǵyna kómektesem keshke qaraı» - deıdi Zeınep Nurzatova.
İzim-ǵaıym joq bolǵan áıel 5 jylǵa jýyqtasa da baýyr eti balalaryn izdemek túgili qońyraý da shalmapty. Alǵashynda ózindik sebepter bolǵan bolar dep, "kókek ananyń" bul áreketine otbasy túsinistikpen qaraǵan. Alaıda, ýaqyt óte kele qaıtyp kelmeıtinin sezgen soń, óz betinshe izdeýge tyrysqandaryn aıtady. Nátıje bolmaǵan soń, otaǵasy sotqa ajyrasý týraly aryz jazyp, alıment tóletýdi suraıdy. Sot qos birdeı ótinishti qanaǵattandyryp, oń sheshim shyǵarǵan kórinedi. Alaıda, 3 jyl ishinde 2 mıllıon teńgege jýyqtaǵan alımentten "kókek ana" balalaryna soqyr tıyn da bermegen eken.
«Ol maǵan bir tıyn da alıment bermedi. Eń bolmasa analyq pravodan aıyrylsyn. Ókimettiń beretini bar ǵoı, áıteýir, qaǵaz, kitaptaryna jetse. Men baladan bezip otyrǵam joq, osylardyń jolynda ólýge daıynmyn» - deıdi Aqyn Sara aýylynyń turǵyny Orynbasar Saýryqova.
Oblystaǵy jeke sot oryndaýshylary áıelderinen alıment talap etken erkekterdiń sany artyp jatqanyn aıtyp otyr. Máselen, bıyldyń ózinde óndiriste 14 myńnan astam alımentti óndirý isi qaralsa, sonyń biraz bóligi otbasyn jalǵyz asyrap otyrǵan erkekterdiń ótinishi. Degenmen, boryshyn óteýden áıelder de jıi jaltarady eken.
«Alıment mendetti túrde birinshi tólenýi kerek. Ol - kámeletke tolmaǵan balalardyń quqyǵy, birinshiden. Ekinshiden, bir ata-ananyń ekinshisiniń aldyndaǵy mindeti, sottyń shyǵarǵan buıryǵy boıynsha mindeti. Sol sebepti, boryshker óziniń mindetin oryndamaǵana jaǵdaıda Ákimshilik kodekstiń 169-baby boıynsha ákimshilik jazaǵa tartylady» - deıdi jeke sot oryndaýshy Ermek Tazabekov.
Ákimshilik jazadan keıin de tıisti nátıje bolmasa is qylmystyq atqarý júıesine ótedi eken. Muny eskersek, 5 jylǵa jýyq boı kórsetpegen anany otaǵasy polısıaǵa shaǵymdaný arqyly qylmystyq jaýapqa tarta alady. Bulaı bolǵan jaǵdaıda, "kókek ana" 2 jylǵa bas bostandyǵynan aıyrylýy múmkin.
