Áne, baıany joq bes kúnnen Sheraǵań da óte bardy. Ne qylsaq ta endi ony qaıtara almaımyz. Kóp ókinish kókirekti qars aıyryp, júrekti ezgileýde... 
Men onyń qasynda kóp júrdim ǵoı. Qystaı qatýly kezderin de, jazdaı jaıdary shaqtaryn da kóp kórdim. Aqıqatty aıtqanda kesek sóılep, iri týraıtyn edi-aý, jaryqtyq. Já, jaraıdy, arystandaı aıbatty Sheraǵam týraly áli talaı shyndyqty jazarmyn. Bul joly, esime túsip otyrǵan bir ǵana oqıǵany qysqasha baıandaıyn. 
Sheraǵań 70 jasqa tolyp jatqan kez edi. Sheraǵańnyń mereıtoıy ótken soń kóp uzamaı parlament úkimetke senimsizdik bildirdi. Sheraǵań sol parlamenttiń beldi múshesi bolatyn. Bári «Jerdi satý týraly Zań jobasynyń» tóńiregindegi daýǵa baılanysty órbidi. Sheraǵań belsene kirisip, úkimettiń jerdi satý jónindegi usynystaryna qarsy shyqty. Aqyry sol úkimetti taratyp tyndy. Bir kezdeskende: 
– Sheraǵa! Úkimet basshysy Sizdi 70 jasyńyzda qatty kóterip edi. Astananyń tórinen úsh bólmeli páter syılap, kitabyńyzǵa qyrýar qarjy bólgizdi. Basqalaı da kómegi az bolǵan joq. Endi ol basqaryp otyrǵan úkimetke qarsy shapqanyńyz yńǵaısyzdaý emes pe? – dep edim, Sheraǵań:
– Múkammal dúnıege bas ıetin adamyń men emes. Úkimettiń basshysy búgin bar da erteń joq. Al halyq máńgi! Halyqtyń taǵdyry tarazyǵa túsip jatqanda maǵan jeke adamnyń ambısıasy kók tıyn. Ne qylsa da halqymdy sata almaımyn! – dedi alysqa kóz tigip. Sol sátte Sheraǵańdy shaý tartsa da sharyqtaýdan jańylmaǵan, qyraǵy kóz taý qyranyna uqsattym.
Aqıqattyń aldaspanyndaı bolǵan qaıran Sheraǵam-aı! Baqul bol! Seni umytýǵa halqyńnyń haqysy joq!

Temirǵalı Kópbaı