Biz ádette júrek aýyrǵanda onyń sebebin bile bermeımiz, oǵan nazar aýdara qoımaıtynymyz da shyndyq. Negizinen mamandar munyń ártúrli sebebi bar ekenin aıtady. Basqa jyl mezgilderine qaraǵanda, adamnyń júregi qys kezinde kóp aýyrady eken. Nege?
Jaqynda Shvesıanyń ǵalymdary munyń jaı-japsaryn naqtylap bergendeı boldy. Olar shvedtiń 50-89 jas aralyǵyndaǵy 274 myń turǵynynyń densaýlyǵyn baqylap kórgen. Nátıje barysy kórsetkendeı, qys kezinde aýa temperatýrasy 0 gradýstan tómendegen kezde júrek mazasyzdana bastaıtyn kórinedi. Biraq «munyń barlyǵy qysqy aýanyń lastanýy, ekologıanyń nasharlyǵynan bolýy múmkin» degen tujyrymnan aýlaq bolý qajet. Ǵalymdar atap kórsetkendeı, júrek syrqatyna qys kezindegi eń negizgi faktor sýyq aýa raıy kórinedi. Sýyqtyń saldarynan da tamyrdaǵy qan qoıýlanady, júrekke aýa jetkilikti dárejede barmaıtyn kórinedi. Onyń ústine adamdar qysqy ýaqytta tońady, sýyq tıedi, sóıtip tymaýǵa jıi shaldyǵady. Bul da adamnyń júrek syrqatyna ushyraý múmkindigin jıiletedi eken.
Mamandar aýa temperatýrasy shamamen +3+4 gradýs bolǵanda júrek syrqaty belgileriniń azaıatynyn da aıtqan. Demek, dárigerler atap kórsetkendeı, qysqy maýsymda jyly kıinip, saqtanyp júrgenińiz abzal.
Biraq jaqynda Kanadada ótken kardıologtardyń jıynynda mamandar ár 20 mınýt saıyn turyp, otyryp, ár jeti mınýttan soń bólmeniń ishinde júrý qajettigin eskertken.
Dúnıejúzilik densaýlyq saqtaý uıymy mamandarynyń esebinshe, ınfark, ınsýlttiń belgileri qazirgi kezde adam óliminiń basty belgileri bolyp otyr. Jyl saıyn álemde júrek aýrýynan 17 mıllıon adam óledi. Sondyqtan budan qutylýdyń jalǵyz joly bar, ár mınýt saıyn az da bolsa, qozǵalys kerek. Shamadan tys júgirip júrekke salmaq túsirýge de bolmaıdy.
