Barar jer basar taýy qalmaǵan ulaǵatty ustaz amalsyz osyndaı kúıge túsken. Tipti, byltyr qatty aıazdy bir aıaǵy úsip qalyp, dárigerler saýsaqtaryn kesip tastapty. Úı-kúısiz júrgen jan týraly Eýrazıa birinshi arnasy habarlaıdy.
«Men túnemegen aıaldamam qalmady, barar jer, basar taýym qalmaǵandyqtan, osynda turýǵa májbúrmin».
Myna aıaldama Elena Donsovanyń turaqty mekenine aınalǵanyna bir aıdan asty. 53 jastaǵy kelinshek barar jer, basar taýy qalmaǵan soń, osy jerge turaqtapty. Aıtýynsha, ózi ustaz bolǵan kórinedi. Tarıh páninen oqýshylarǵa sabaq beripti. Birińǵaı ulttyq testke birqatar bitirýshi túlekti daıyndapty. Endigi otyrysy mynaý.
«Komsomoldan bastap ustazdyqqa deıin eńbek ettim. Shymkenttegi birqatar mektepte muǵalim boldym» - deıdi turaqty mekenjaıy joq Elena Donsova.
Kezinde mektepte ájeptáýir abyroıy bolǵan ustaz birte-birte spırtti ishimdikke áýestenipti. Keıin qatty salynyp ketkeni sonshalyqty jumystan qýylǵan. Ol az bolǵandaı, kelinshekten joldasy men qyzy da bas tartqan. Dalada qalǵan soń Shymkenttegi áleýmettik beıimdeý ortalyǵyna baryp turady. Qazir, ol úshinshi kún osynda túnep júr. Ystyq tamaq pen jatyn orynǵa tez beıimdelgeni sonshalyqty ázirge eshqaıda ketkisi joq. Aldaǵy qysty eskerdi me, osynda qala turýdy qalap otyr. Sebebi, byltyr qatty aıazda bir aıaǵy úsip qalyp, dárigerler saýsaqtaryn kesip tastapty. Al, ortalyq mamandary bolsa, ony dárigerlik tekserýden ótkizip, jeke basyn anyqtap jatyr eken.
«Qujatyn qalpyna keltirgen soń jańaǵy densaýlyǵyna qarap, múgedektikke shyǵarý nemese qarttar úıine joldaý nemese dárigerlik kómek kerek bolsa, aýrýhanaǵa ótkizý bizdiń mindetimiz bolyp sanalady» - deıdi ýaqytsha beıimdeý ortalyǵy basshysynyń orynbasary Sáýen Janysbaev.
Elena Donsovanyń turaqty mekenjaıyn biz izdep taptyq. Qalanyń shetki aýdandarynyń birinde turǵan eken. Kórshileri ony teris jaǵynan sıpattap berdi. Kúıeýimen ajyrasyp, analyq quqyǵynan da aıyrylypty. «Bárine ishkilik sebep»,- deıdi.
«Ol páterdi jyn-oınaqqa aınaldyryp jiberdi. Kúnde toı, kez kelgen ýaqytta ishimdik iship júrdi. Tipti esirtki paıdalandy dep te estidik. Sondyqtan ony eshkim qabyldaı almaıdy»,-deıdi kórshisi Valentına Dáchenko.
53 jastaǵy kelinshek myna úıdiń 1-qabatynda turǵan. Biraq, qazir kórshileri odan azar da bezer bolyp qashyp otyr. Sebebi jumystan shyǵyp qalǵan burynǵy muǵalim osy mańdaǵy ishimdikke áýes bótelkelesterin jıyp alyp, páterdi jyn-oınaqqa aınaldyryp jibergen eken. Onyń osy ádetin estip bilgen kúıeýi aqyr sońynda úıden qýyp jiberse kerek. Sóıtip, páterdi qyzynyń atyna rásimdegen. Mine, sońǵy eki jyldan beri páter qańyrap bos tur.
Osy kúni burynǵy ustazdyń qujattary rásimdelip jatyr. Daıyn bolǵan soń qaıda ornalasatyny belgili bolady. Oǵan deıin ýaqytsha beıimdeý ortalyǵynda qala bermekshi.
