Endi úsh kúnnen keıin Máskeýde AIBA-nyń prezıdenti saılanady. Oǵan qazaq ultynyń ókili Serik Qonaqbaev pen ózbek Ǵafýr Rahımov talasaıyn dep otyr. Bul taq talasta kimniń bási joǵary bolady?
Ázirge qýanyshtysy, bizge birer kún buryn Lozannadan jyly habar keldi. Halyqaralyq boks qaýymdastyǵynyń (AIBA) vıse-prezıdenti Serik Qonaqbaevtyń sporttyq arbıtrajdy sotqa (CAS) jibergen shaǵymy qanaǵattandyrylyp, ol resmı túrde prezıdenttikke úmitker atandy. Bul týraly Ulttyq olımpıadalyq komıtettiń baspasóz qyzmeti habarlady.
–CAS pen bul iske qatysýshylarǵa meniń shaǵymym boıynsha ádil sheshim shyǵarǵany úshin alǵys aıtamyn. Biz keltirgen dálelderdi CAS-tiń oń qabyldaǵanyna rızamyn. Men úshin AIBA prezıdenttigine úmitker ataný úlken qurmet. Endi basshylyqty mindetti qolǵa alyp, bizdiń uıymymyz ben sportymyzdy ulttyq federasıalarmen birlese otyryp qaıta jandandyratyn múmkindigimiz bar. Maǵan prezıdenttikke úmitker atanýǵa múmkindik berdi. Ári qaraı Prezıdıýmdy oryndy utyp alý úshin bar kúshimdi salamyn. Muny ózim úshin emes, bizdiń boksshylardyń quqyǵyn, olardyń Olımpıadadaǵy armany men úmitin qorǵaý úshin istegim keledi. Bul mindetke úlken jaýapkershilikpen qaraı otyryp, 3 qarasha kúni Máskeýde ótetin saılaýdy asyǵa kútemin. AIBA-nyń jarqyn bolashaǵy úshin qaýymdastyqtyń barlyq múshelerinen meniń kandıdatýramdy qoldaýdy ótinemin, - dedi qazaq boksynyń bolashaǵyn oılaǵan Serik Qonaqbaev.
Aıta ketý kerek, osy ýaqytqa deıin Halyqaralyq áýesqoı boks qaýymdastyǵynyń mindetin atqarýshy qyzmetine Ǵafýr Rahımov taǵaıyndalǵany belgili. Kezinde ózbek jerinen qýylyp, «qylmysqa qatysy bar» delingen Rahımov bılikke Mırzıeev kelgeli qaıtadan Ózbekstan shekarasyn attaýǵa ruqsat aldy. Sońǵy Azıa chempıonatynda ózbekter altyndy kóbirek alyp, qazaq boksshylaryna kedergi jasalǵanynan da jurtshylyq habardar. Onyń ústine sońǵy jyldary AIBA-nyń basshylary qylmystyq jaýapkershilikke tartylyp, atalǵan uıymnyń bedeli de tómendep ketti. Sondyqtan árıne bul jerge qazaq boksynda orny bar Serik Qonaqbaevtyń barǵany tıimdi. Bul biz úshin de abyroı bolar edi.
Al ózbek Rahımovtyń AIBA-nyń prezıdenti bolýǵa múmkindigi bar ma? Kim jeńedi? Rahımov pa, Qonaqbaev pa? Bul másele aldaǵy ýaqytta 3 qarashada Máskeýde ótetin AIVA-nyń kongresinde sarapqa salynady.
Eskerte keteıik, 2017 jyldyń shilde aıynda AIVA-nyń atqarýshy komıtetiniń 13 múshesi uıymnyń basshysy Chıng-Kýo Výǵa senimsizdik bildirip, onyń otstavkaǵa ketýin talap etti. «Qarjy jymqyrdy» dep aıyp taǵylyp, qazirgi ýaqytta oǵan qatysty tergeýaldy jumystary júrgizilýde. AIVA-nyń tártiptik keńesi ótken jyldyń qazan aıynda ony birjola qyzmetten shettetti.
Demek, budan shyǵatyn qorytyndy ne? AIVA sıaqty irgeli uıymǵa qazaq Qonaqbaev sekildi taza ári adal adam kerek. Biz ulttyń abyroıyn asyryp júrgen qaıratker azamatqa jeńis tileımiz.
