Mınıstr men depýtattar ádebıetten sóz jarystyryp jatqanda, ákimder ózi basqaryp otyrǵan aımaqty maqtaýmen álek. Ǵalamtordaǵy kóz shalǵan jaǵdaı bul. Jastar sózimen aıtsaq, chellendjder kóbeıdi. Taǵy bir qyzyq. Astanaǵa jańadan taǵaıyndalǵan ákim klıpke túsýi múmkin eken. Baqyt Sultanovqa mundaı usynysty jasaǵan kim? Bul týraly Eýrazıa birinshi arnasy habarlaıdy. 

Bul elimizdiń eń kóńildi rektory shyǵar. Pavlodardaǵy Joǵary oqý ornyn basqaratyn Marat Baıandın áleýmettik jelilerde "Skıbıdı chellendj" atymen tanymal bıdiń jelisimen stýdentterdi ulyqtaý rásimine shaqyrǵan bolatyn. "Jastarmen únemi jumys isteıtindikten olarmen bir tolqynda bolǵym keldi",- deıdi ózi.

«Tak, otlıchno razmálsá. Teper, ıa dýmaıý, mojno sqodıt ı posmotret posváshenıe stýdentov».

Oqý ornyn emes, bútin bir óńirdi basqaryp otyrǵan ákimder shańdata bılemese de, ózindik chellendjge qatysyp júr. Eń birinshi bolyp Shymkent pen Astanananyń burynǵy ákimi kórindi. Ǵabıdolla Ábdirahymov Shymshahardy "Zyń", Áset Isekeshev Elordany «Samaıa vyshka» dep ataǵany este.

- Ómirdi bir-aq ret súrý kerek, ony qaıda súrý kerek, Ǵabeke?  

- Shymkentte. Shymkent zyń-zyń!

- Áset Órentaevıch, Astana qandaı?  

- Astana -Samaıa vyshka!

Úshinshi megapolıs Almatynyń ákimine berilgen kezek áli jalǵaspapty. Baýyrjan Baıbekten jaýap almaq bolǵan Erǵazy Ázimhanuly aqyry ákimdik tabaldyryǵynan attaı almaı, qaıtyp ketýge májbúr boldy.

“Ókinishti, árıne! Múmkin, bul kisilerdiń basqa da jumystary kóp shyǵar. Múmkin tıinniń sharýalarymen júrgen shyǵar. Sol úshin biz eshteńe deı almaımyz”

Esesine, Aqtóbe oblysynyń ákimi Berdibek Saparbaev pen Taraz qalasynyń basshysy Ǵalymjan Ábdiraıymovtan jaýap alýdyń sáti túsipti.

- Aqtóbe oblysyn janýarǵa teńeseńiz, qandaı janýarǵa teńeıtin edińiz?  

- Barysqa. Aqtóbe barysqa uqsaıdy. Turǵan jeri, jan-jaǵy, halqy.

- Ǵalymjan aǵa, Taraz qalasy qandaı óleńniń sózderimen sıpattaısyz?  

- Óleńdi ne qylamyz, kınomen kórsete bereıik te.  

- Qandaı kıno?  

- «Djentelmeny ýdachı» «Tam teplo, tam moıa mama».  

- Al óleńmen sıpattasaq she sonda da.  

- Ot-ot janaryń!

Ákimderdi ózgeshe suraqtarmen mazalap júrgen Erǵazy Ázimhanulymen tildestik. Minberde otyrǵandar da qarapaıym adamdar ekenine kóz jetkizgim keldi deıdi ózi. Kóbinese qoıylǵan maqsat ózin aqtap jatqan kórinedi. Kelesi jaýap Qyrymbek Kósherbaevtan suralatyn sekildi. Al Astanaǵa jaqynda taǵaıyndalǵan Baqyt Sultanov klıpke túsýi múmkin eken.

“Josparda qazir kishkene Sizderge aıtyp qoıaıyn. Bir óleń bar. Hıt óleń myqty. Sol óleńniń sózderin shamalap ózgertip, ákimniń jańa qazirgi jumysy qalaı bolyp jatqany týraly ınstagramda kreatıvti klıpimizben jetkizgimiz kelip tur. Ol klıpte bizdiń jańa ákim Baqyt Sultanov túsetin bolady» - deıdi bloger Erǵazy Ázimhanuly.

Bılik basyndaǵylardan taǵy bir chellendj. Jaqynda Aqparat jáne komýnıkasıalar mınıstri óz paraqshasynda bir vıdeo jarıalady. "Tulpar minip, tý alǵan" atty ulttyq joba aıasynda Dáýren Abaev «Alpamys batyr jyrynan» úzindi oqyp shyqty.

«Dalada men otyrmyn quryp órmek. Jalǵyzymdy qasymda qylyp ermek. Balamdy meniń jalǵyz óltirgenshe, Alsaıshy Gúlbarshyndy qý júgirmek» - deıdi QR Aqparat jáne komýnıkasıalar mınıstri Dáýren Abaev.

Mınıstr jyr kezegin depýtat Gennadıı Shıpovskıhke berdi. Halyq qalaýlysy ózin kóp kúttirmedi. Dastan oqýdan kende emes ekenin kórsetip qaldy.

“Talaı bala qyrǵansyń. Shekti degen elińde. Sarybaı degen baı edi. Jalǵasqyzy Gúlbarshyn 15-te týǵan aı edi. Jasyńnan saǵan aıttyrǵan Gúlbarshyn sulý jar edi. Al endi osy estafetanyń jalǵasyn elimizdiń batyry, áriptesim Baqytbek Smaǵul aǵamyzǵa joldaımyn» - deıdi QR Parlamenti Májilisiniń depýtaty Gennadıı Shıpovskıh.

Mınıstr, depýtattar osylaısha eldiń ádebıetke degen qyzyǵýshylyǵyn oıatqysy kelgen sekildi.