Qazaqstan Respýblıkasy
Senat depýtattaryna
Qurmetti halyq qalaýlylary! Osy hatty óz atymnan jáne búkil Jeltoqsandyqtar atynan sizderge joldap otyrmyn.
Álemde 200-den astam táýelsiz memleketter bolsa, solardyń árqaısysynyń tarıhı ótpeli kezeńi bar. Sonyń ishinde bizdiń halqymyzǵa da egemendikke qol jetkizý ońaıǵa túsken joq. Qazaq dalasynda 300-den astam úlkendi-kishili kóterilister men bas kóterýler bolǵan. Al sonyń barlyǵyna derlik núkte qoıǵan Almatydaǵy 1986 jylǵy bolǵan Jeltoqsan kóterilisi boldy. Sodan beri Elbasymyz aıtqandaı: «Almaty – táýelsizdiktiń altyn besigine» aınaldy. Buǵan eshkim daý aıta almas dep oılaımyz.
Keńes ókimeti tusyndaǵy bılikke qarsy kelý túgili, qarsy sóıleýge eshkimniń dáti shydamaıtyn. Sol buǵaýdan bosaýǵa, elimizdi bodandyqtan qutqarýǵa qazaqtyń qarshadaı ul-qyzy basyn báıgege tikti. Qansha bozdaq qyrshyn ketti. Buǵan tarıh kýá, siz ben biz kýámiz.
Qaırat Rysqulbekov, Lázzat Asanova, Erbol Sypataev, Sabıra, t.t. qansha beıkúná jastar temir torǵa qamalyp, qanshasy múgedek bolyp qaldy, keıbir ul-qyzdarymyz ómir boıy ata-ana bolý baqytynan aıyryldy. Iá, bul osyndaı qıyndyqpen kelgen táýelsizdiń edi.
Kerek deseńiz, Jeltoqsan kóterilisi bizge ǵana emes, keshegi Keńes Odaǵy memleketterine de egemendik alyp berdi! Aıtpaǵym, osy jeltoqsan kóterilisine de 30 jyldan asyp ketti. Biraq áli kúnge óziniń tarıhı jáne saıası baǵasyn (statýs) alǵan joq. Tarıhı oqıǵalardyń araǵa ýaqyt tastap baryp óz baǵasyn alyp jatatyny bar. Alaıda qanmen kelgen táýelsizdiktiń eshteńe táýeldi bolmaı, shyndyqtyń saltanat qurǵanyn qalaımyn.
2016 jyly Astana qalasynda jeltoqsannyń 30 jyldyǵyna arnalǵan halyqaralyq ǵylymı konferensıada ótken edi. Sonda 10-nan astam memleketten ǵalymdar, saıasatkerler keldi. Sol búkil basqa elden kelgen kisiler bir aýyzdan Jeltoqsandy kóterilis dep moıyndady. Sonda búkil álem baǵasyn berip otyrǵan Jeltoqsannyń baǵasyn nege bizdiń memleket bermeıdi, moıyndamaıdy.
Qurmetti halyq qalaýlylary!
Sizderdiń ultjandylyqtaryńyzben adamı qasıetterińizge sene otyryp elimizdiń zań shaqyrýshy organnyń biri dep, Jeltoqsannyń tarıhı jáne saıası baǵasyn (statýs) berýge atsalysady dep senim artamyn.
Qurmetpen Qudaıshúkir Rahmatýllauly Abdýllaev
