Almatylyq kelinshek bir aılyq sábıin perzenthanadan ala almaı júr. Dárigerler 
«tólqujatyń joq» degen jeleýmen balasyn bermeı jatyr eken. Ony bir aptanyń ishinde jasatpasań, shaqalaqty balalar úıine ótkizemiz degen talap qoıypty. Al, 29 jastaǵy áıel 15 jyl buryn Ózbekstannan kóship kelgeli áli qujat rásimdemegenin aıtady. Biraq, jeti jyl buryn tuńǵyshyn dúnıege ákelgeninde baýyryma basyp, emizip edim dep zar jylaýda. Bul týraly Eýrazıa birinshi arnasy habarlaıdy. 

Eki kóziniń jasy bir aıdan beri tyıylmaǵan kelinshek ózin Lına İlıasovamyn dep tanystyrdy. Tamaǵyna turǵan óksigine tunshyǵyp, áreń sóıledi. №3 perzenthananyń esigin toraýyldap, sábıine jasandy sútti kúnde tasımyn deıdi. Óıtkeni, otyz kún buryn bosanǵan kelinshek balasyn bir apta ǵana emizipti. Odan keıin, dárigerler jeke basyńdy rastaıtyn kýáligiń joq dep shyǵaryp jiberipti. Al, qyzyńdy qujatyń rásimdelgen soń beremiz degen. 

“Men aqyly palatada jattym. 205 myńdy qoldaryna sanap berdim. Túbirtegi bári ózderinde. Jylaı-jylaı jasym taýsyldy. Dárigerlerdiń kesirinen sútim tartylyp ketti. Olar aqsha alarda qujat suramaı, balammen úıge shyǵarda nege qujatymdy surap otyr?” – deıdi qala turǵyny Lına İlıasova.

Sóıtse, 29 jastaǵy Lına İlıasova otbasymen Ózbekstannan 15 jyl buryn kóship kelipti. Mektepti de osynda oqyǵan. Qolynda Týý týraly kýáligi ǵana bar. Áke-sheshesi maskúnemdikke salynyp, joq bolyp ketipti. Al ózi Qazaqstan azamattyǵyn almaǵan. Ózbekstan azamattyǵynda bar-joǵyn da bilmeıdi eken. Sondyqtan, jeke kýálik jasatarda kóshi-qonda biraz qıyndyqtar bolyp, sol boıy ala almaǵan. Esh jerde tirkeýi de joq eken. Kesirinen bilim almaǵan. Nekesi de qıylmaǵan. Alaıda, birinshi balamdy qujatsyz-aq ıiskep, oǵan qujat ta aldym deıdi.  

“Men qyzymnan bas tartyp turǵanym joq. Meniń taǵy úlken ulym bar. Jasy 8-de. Týý týraly kýáligi bar. Mende joq bolǵanymen oǵan kezinde jasattym. Men balamnan bas tartqan joqpyn. Maǵan bir apta ýaqyt berip otyr. Eger qujat ákelmeseń, balalar úıine ótkizemiz deıdi” - deıdi qala turǵyny Lına İlıasova.

Onsyz da Kóshi-qonnyń tabaldyryǵyn tozdyrǵan kelinshek qujat jasaý bir apta túgili bir jylda bitetin tirlik emes deıdi. Balalar úıine ótip ketse, kýáliksiz ózimniń qyzym ekenin dáleldeý tipti qıyn dep otyr. Al, №3 perzenthanada akýsher ne genıkologty tappadyq. Tek zańgeri rásimdelgen birde-bir qujatyn kórsetpeı, sábı aýrýshań dep qysqa qaıyrdy. Anasymen birge jiberý úshin qujatyn kútip otyr eken.     

“Lına İlıasova óziniń jeke basyn rastaıtyn qujatty ákelgen ýaqytta ǵana biz balany birge jibere almayz. Oǵan deıin sábı perzenthanada bolady. Kúnde kelip, kórip turady. Eshkim shaqalaqty tartyp almaıdy, tek qujatyn ákelsin de, balasyn alyp ketsin” – deıdi №3 perzenthana zańgeri Nazar Sarlybaev.

Bosanýy kerek bolǵan soń kelinshekti qujatsyz-aq qabyldaýǵa májbúr boldyq deıdi perzenthanadaǵylar. Tipti, memlekettik mekemeniń dárigerleriniń aqyly kómek kórsetýi de zańdy eken. Endi taǵy bir apta kútemiz, qujaty bolmasa, memlekettik qamqorshylarǵa habarlasamyz deıdi. Al, advokattar elimizdiń Ata zańynda ana men balany qujat úshin aıyrýǵa bolatyn birde-bir bap joq deıdi.   

Búgin Lına İlıasova polıseılerge aryz jazýda. Qujatyn rásimdeýge de kirisip ketti. Biraq, qaptaǵan qaǵazbastylyqtan munyń jýyq arada sheshiletin túri joq. Al, perzenthananyń perzentti bir aıdan artyq ustaýǵa bolmaıtynyn eskersek, memlekettik qamqorshylar balalar úıine ótkizip jiberýi de ábden múmkin.