Kúni keshe Aqtóbede «Jas Otan» jastar qanatynyń ókilderi qalanyń túrli mektepterinen jalpy sany 150-ge jýyq oqýshyny jınap, qoqys polıgonyna aparǵandyǵy týraly aqparat tarady. Belsendi jastardyń mundaǵy maqsaty óskeleń urpaqty qalany, tabıǵatty taza ustaýǵa shaqyrý bolǵan sekildi. Alaıda arty renish pen ákimdikke shaǵymdanýǵa ákep soqtyrǵan bul ekskýrsıa jurt nazaryn ekologıa men kóshe mádenıetine emes, oqýshylardyń gıgıenasy men basshylyqtyń ata-anaǵa eskretpeý, ruqsat suramaý máselesine aýdardy. "Qamshy" ekskýrsıa barysynan alǵan emosıasyn tikeleı efırde uıaly telefonǵa túsirip alǵan bir oqýshynyń vıdeosyn usyna otyryp, eki túrli pozısıa ustanǵan qarapaıym halyqtyń oı-pikirin talqyǵa usynady. Bir-aq nárse túsiniksiz: bul sharany ótkizý memlekettik tapsyrma bolǵandyǵyn ashyq aıtqan "Jas otandyqtardyń" balalardy maskamen qamtamasyz etpegendikteri.
Tómendegi vıdeoǵa kóz júgirteıik...
Myna vıdeodan qoqys polıgonynda júrgen oqýshylardy kóre alasyz. Úıdegi kishkentaı shelek qoqysqa tolyp qalyp, dereý tógilmese, asúıdiń ishin jaman ıis alyp ketetinin jaqsy bilemiz. Ondaı ıiske shydaý múmkin bolmaı ketedi. Endeshe, alyp qoqys polıgonynan shyǵatyn ıistiń qandaı bolatyndyǵyn elestetý, boljaý da qıyn. Maskalary joq balalar muryndaryn jaýyp álek. Emosıalaryna zer salsaq, ábirjigen, shoshyǵan, ózderin jaısyz sezinip turǵan balalardy ǵana kóresiz. Úılerine aman-esen jetken olardyń densaýlyqtary syr berip, tipti keıbiri ata-anasyna mán-jaıdy aıtyp, syr aqtarǵan.
Endi tómendegi myna jazbaǵa kóz júgirtip jibersek...
Mysaly, №3 mekteptegi oqýshynyń ata-anasy osyndaı aryz túsiripti. Tárjimalap bereıik.
«Sálemetsizder! Aqtóbedegi №3 mekteptiń 8 V synybynyń ata-analarynyń atynan narazylyq bildirgim keledi. 2018 jyldyń 21 qarashasynda bizdiń synyptyń oqýshylaryn avtobýspen qoqys úıindisin jınaıtyn zaýytqa aparǵan. Ǵımarattyń ishinde jaǵymsyz ıis múńkip tur, sýyq. Balalarymyz úıge ań-tań bolyp keldi. Kórgen dúnıelerinen qatty shok alǵan. Kesh boıy bastary aýyryp, júrekteri aınyp, loqsyp qusqan. Iá, túsinikti jaǵdaı, oqýshylardy májbúrli túrde apardy. Alaıda mundaı tapsyrmalarǵa balalardy paıdalanýdy qashan doǵarasyzdar? Ákimniń ne jumys istep jatqanyn halyq onsyz da kórip otyr. Ákimdiktiń paraqshasyndaǵy pikirlerge shekteý qoıyp tastaǵan. Kózboıaýshylyqtyń ne qajeti bar?».
Ata-analardyń aıtýynsha, balalary kesh boıy ózderin nashar sezingen, tipti erteńinde teń jartysy sabaqqa barmaǵan. «Jas Otan» jastar qanaty «bul – memlekettik tapsyrma» dep jaýapkershilikten at-tonyn ala qashty. Al ekskýrsıa nebári 15-20 mınýtqa jalǵasqan. Ári polıgondy tek syrtynan baqylapty. Tipti №3 mekteptiń basshylyǵy da jaýapkershilikti arqalaýǵa qaýqarsyz. Dırektor orynbasarynyń aıtýynsha, balalar kúrteshelerinen jaǵymsyz ıisti ketirý úshin jýǵan eken, erteńinde keppeı qalǵandyqtan mektepke kelmegen.
Halyq ne deıdi?
Bul jaǵdaıda turǵyndardyń pikiri ekige bólindi. Biri balalardy osyndaı ekskýrsıalarǵa jiberip turýdy durys dese, endi biri ákimdiktiń áreketine ashýly. Jelidegi pikirler saryny tómendegideı.
@LyudaFarzalieva Durys... Balalarǵa sabaq bolsyn! Keıde balalarymyzdy tym qatty qorǵashtaımyz. Sosyn nátıjesi osyndaı bolady. Jarty saǵatta turǵan eshteńe joq. Ómirdiń aqıqatyna kózderi jetsin!
@rino4ka_04 Menińshe, ol ekskýrsıaǵa aldymen ata-analardyń ózderin aparý kerek. Bala úlkenge qarap ósedi. Árıne, olardyń da kórgeni durys. Máselen, kóshede anasy men balasy ketip bara jatyr. Anasy balasyna shokoladty ashyp berdi de, qaǵazyn jolǵa tastaı saldy. Muny kórgen bala qalypty jaǵdaı dep oılaıdy. Keleside ózi de solaı isteıtin bolady. Ata-ana birinshi ózin tárbıelesin!
@akzer_a Oqýshylardyń bárin aparý kerek edi. Sol kezde, balalar aýla tazalaýshylarynyń eńbegin baǵalar edi. Óz podezin taza ustaýdy úırenetin edi.
@asemgulesenalina Bizdiń mekteptiń úlken synyptary da ekskýrsıaǵa bardy. Arasynda meniń qyzym da bar, 10 synypta oqıdy. Biraq olardy barýǵa eshkim májbúrlegen joq, qaıda baratyndaryn aldyn ala bildi de. Qyzym da aryzdanyp keldi, ishiniń sasyq ekenin aıtty, júregi aınydy. Alaıda ekskýrsıa nebári jarty saǵat bolǵan. Menińshe, qyzym kishkentaı emes, boı jetip keledi. Óziniń ne istep júrgenin jaqsy biledi. Ol gúl satatyn dúkenge emes, qoqys úıindisin jınaıtyn zaýytqa bardy. Bári sózsiz-aq túsinikti edi. Balalardyń kórgenderinen sabaq alǵandaryna senimdimin. Túımedeıdi túıedeı qylýdyń qajeti joq. Ómirdi tanysyn!
Al qarsy pikir ne deıdi?
@Luliiakorobova Ata-analardyń narazylyǵy oryndy. Balalardy mundaı ekskýrsıaǵa aparmas buryn ruqsat suraý kerek edi. Ákimdik balalarymyzdy qashanǵy paıdalanady? Balalarymyzdyń ómirin qashanǵy qaýipke tigedi? Endigári mundaı ekskýrsıalarǵa oqýshylardy jibermesin! Kerek bolsa, ákimniń balalary barsyn!
@ayila.aliya Balalar sabaq oqýy tıis, qoqys arasynda júrgeni nesi? Masqara...
@real_2910 Ata-ananyń ruqsatynsyz balany ekologıalyq qaýipti aımaqqa jibergen. Ol jerde aýa arqyly ınfeksıalyq aýrýlardy ońaı juqtyrýǵa bolady. Balalarǵa tipti maska bermegen. Al zaýytqa apararda plasıkany óńdeý zaýytyna aparamyz dep aıtqan eken. Al bári kerisinshe bolyp shyqty.
@aikerim_zhumagali birden máıithanaǵa aparýlary tıis edi. Ómirdiń qadirin túsinsin dep...
Qalalyq qoqys polıgonyna synyben barǵan Elena emosıasyn bylaı bildirdi...
@elena_fil_ biz ekskýrsıada boldyq. Ol jerdiń jaǵymsyz ıisin sózben aıtyp jetkizý múmkin emes. Ústimizge basqa kıim kıý jaıly da eskertý jasaǵan joq. Ústimizdegi kıimge álgi ıis sińip qalǵan. Jerde ólgen ıtter jatty. Al endi bizdiń jaǵdaıymyzǵa kirip kórińizder, qalasyńyzdar ózderińiz de baryp sezinińizder!
Pikir qaldyrý