Qazaqstan jer kólemi jóninen álem elderiniń ishinde 9-shy oryn alatyny barlyǵymyzǵa belgili. Klımaty da kóp qyrly. Iaǵnı, el aýmaǵyndaǵy túrli aımaqtardyń aýa raıy ártúrli. Álbette munyń bári geoaqparattyq júıeniń bolýyn talap etedi. Óıtkeni, dál osy geoportaldar arqyly geografıalyq jaǵdaıdy, aımaqtardyń sıpattamasyn, qurylymyn bilýge bolady. Qazirgideı qubylmaly ýaqytta, ózgermeli tabıǵı jaǵdaıda geografıalyq aqparattyq keńistik el turǵyndaryna baǵyt-baǵdar kórsetýge múmkindik beredi.
Geoportaldy engizýdegi negizgi maqsat – spýtnıktik beıneler men vektorlyq geoderekterdi taldaý jáne óńdeý. Sondaı-aq, olardy avtomattandyrylǵan júıede alý múmkindigi. Osyndaı zamanaýı tehnologıa geografıalyq derekterdiń kóptegen túrlerin bilýge múmkindik beredi. Júıede spýtnıktik sýretter, kartalar, vektorlyq qabattar syndy aqparattar qamtylǵan.
Geoaqparattyq portaldar búginde elimizdiń birqatar óńirinde qyzmet etýde. Sol óńirlerdiń qataryna Mańǵystaý oblysy da kiredi. Jergilikti ákimdik «Qazaqstan Ǵarysh Sapary» ulttyq kompanıasy» AQ-men birlese otyryp, biryńǵaı geoaqparattyq júıeni kezeń-kezeńimen jasaqtaý týraly kelisimge keldi. Atalǵan sharalar 2018 jyldyń sáýirinen beri júzege asyrylýda. Bul ákimdik qurylymdyq bólimsheleriniń sharýashylyq qyzmetiniń negizgi baǵyttaryn baqylaýǵa jáne monıtorıń jasaýǵa arnalǵan. Atalǵan pılottyq jobany engizý úshin ákimdik tarapynan 17 mln. teńge kóleminde qarajat bólingen. Qazirgi tańda osy jumystardy oryndaý úshin birqatar is-sharalar júzege asyrylýda. Atap aıtqanda, «mangystau.gharysh.kz» aqparattyq agenttigi quryldy. Sondaı-aq, monıtorıń júıesiniń arhıtektýrasy ázirlenip, bastapqy derekterge qoıylatyn talaptar ázirlendi. Joǵary jáne ortasha spýtnıktik beıneler óńdelip, qajetti derekter sıfrlandyryldy. Al nátıjeleri geoportalda jarıalandy. Mangystau.gharysh.kz saıtyna búginde mynadaı qyzmetter qosylyp úlgerdi: Mańǵystaý oblysynyń ǵarysh kórinisteri mozaıka túrinde kórsetilgen. Onyń ishinde Aqtaý qalasy, Jańaózen jáne Fort-SHevchenkonyń ǵaryshtan kórsetilgen beınesi bar; Jyljymaıtyn múlik obektileriniń barlyq atrıbýttary sıfrlandyryldy. Injenerlik jeliler, kóshe-jol jelisi, jasyl keńistikter men sý obektileriniń báriniń beınesi sıfrlyq formatqa kóshti. Atalǵan portalǵa temirjol sýretteri, magıstraldi joldar, munaı-gaz obektileri, tarıhı oryndar men barlyq nysandar endi. Budan bólek, oblystyń barlyq aýdandary men aýyldarynyń geografıalyq orny men sıpattamalary engizildi. Bir qyzyǵy – jergilikti jurtshylyq osy portal arqyly qoǵamdyq kólikterdiń qozǵalysyn bile alady. Iaǵnı, transport júıesi de kórsetilip otyrady. Ákimshilik mekemeler, áleýmettik oryndardyń barlyǵy saıtta kórsetilgen.
