Kez kelgen halyqtyń óshpes qundylyǵy – mádenı murasy. Mádenıetti jańǵyrtý, ony qaıta túletý – ulttyń rýhanı turǵydan baı bolýyna yqpal etedi. Osy jolda mol muraǵatymyzdy halyqqa jetkizýdi jeńildete túsý qajet. Bul oraıda qyzmet kórsetý salasynda elektrondyq format qoldanysta. Mundaı júıe el-jurtymyz úshin jaılylyq pen qoljetimdilik syılaıtyny sózsiz.
Tyń júıe Mańǵystaý oblysynyń mádenı mekemelerinde keńinen qoldanylyp jatyr. Iaǵnı, jergilikti jurtshylyq mádenı qoıylym bıletterin onlaın-rejımde alý múmkindigine ıe boldy. Osy sharalardyń bári búginde óz nátıjesin kórsete bastaǵan «Sıfrlyq Qazaqstan» memlekettik baǵdarlamasynyń tóńireginde iske asyrylýda.
Baǵdarlamaǵa sáıkes, oblystyń Mádenıet basqarmasyna qarasty barlyq uıymdar men mekemelerdiń elektrondyq portaly ázirlenip, qyzmetterin qalyń kópshilikke kórsetýde. Buǵan mysal retinde, N. Jantórın atyndaǵy mýzykalyq-drama teatryndaǵy, qýyrshaq teatryndaǵy, tarıhı-ólketaný mýzeıindegi, sondaı-aq M.Óskinbaıuly atyndaǵy oblystyq fılarmonıa men «Iýnost kınoteatryndaǵy biryńǵaı elektrondyq júıelerin aıtsaq bolady (kirý bıletterine qatysty).
Mańǵystaýda mádenı salany sıfrlandyrý maqsatynda kitaphanalyq qorlar da elektrondyq júıege kóshirilip jatyr. Statısıkalyq málimetterge súıensek, oblys kitaphanalaryndaǵy 1 454 451 kitaphanalyq qordyń 442 695-i elektrondy katalogqa enipti. Budan ózge, oblystyq kitaphana qoryndaǵy ólketaný taqyrybyndaǵy 304 ádebıet sıfrlyq formatqa aýystyryldy. Ol óz kezeginde QazUEK portalyna ornalastyrylyp úlgerdi. Sondaı-aq, aýyl kitaphanalarynyń bazasynda onlaın ortalyqtar boı kóterip, turǵyndarǵa óz qyzmetterin kórsetýde. Bul aýyldardyń qataryna: Aqshuqyr, Jetibaı, Jyńǵyldy, Boranqul, Mańǵystaý, Teńge aýyldary kiredi. Mundaı ortalyqtar halyqtyń zańgerlik kómek pen medıasıaǵa qoljetimdiligin arttyrady.
Memlekettik baǵdarlama aıasynda óńirdiń mýzykalyq mádenıeti de qaıta túlemek. Osyǵan oraı, «Maqamy máshhúr Mańǵystaý» atty dástúrli mýzykalyq mádenıetiniń elektrondyq portaly jasaqtalyp jatyr. Onyń ishine umyt bolǵan 200-ge jýyq mýzykalyq týyndylar enbek. Bul portaldy jasaý shamamen 2 jylǵa sozylady dep josparlanýda. Nátıjesinde, elektrondyq portal arqyly kúlli qazaq eli mýzykalyq muramyzdan nár alatyn bolady. Osy rette, qaıtalanbas barlyq týyndylardyń tarıhy men avtorlary taıǵa tańba basqandaı jazylyp, jyl ótken saıyn tolyqtyryla túspek. Igilikti isti jetildirý maqsatynda búginde «SaspianMediaServise» JSHS-pen kelisim-shartqa otyrdy.
Álem elderine kóz salar bolsaq, mádenıeti men týrızmine kóńil bólip jatqan elder óte kóp. Olardyń deni bul salany sıfrlandyrý arqyly saqtap qalaryna senimdi. Sonyń eń úzdikteri – Sıngapýr men Shanhaı. Osy turǵyda olar birqatar sıfrlyq baǵdarlamalar men jobalardy daıarlap, búginde nátıjesin kórýde.
