Memlekettiń densaýlyq saqtaý saıasaty el azamattarynyń saý ári uzaq ómir súrýine baǵyttalǵan. Ólim-jitim kórsetkishin tómendetý, ana men balanyń densaýlyǵyn jaqsartý, eńbekke jaramdy azamattardyń sanyn ulǵaıtý –otandyq medısınanyń basty mindeti sanalady. Damyǵan 30 eldiń qatarynan kóriný úshin JIÓ kórsetkishterin kóterip qana qoımaı, halyqtyń denin saý etý – myqty memleketke tán daǵdy. Qazaqstannyń medısınasy da jyl ótken saıyn jandanyp, zamanaýı talaptarǵa saı bolýǵa tyrysyp baǵýda. Bul progresterge jetý úshin birqatar josparlar men jobalar júzege asyp ta jatyr. Sonyń biri – «Sıfrlyq Qazaqstan» memlekettik baǵdarlamasy.
Densaýlyq saqtaý salasynda sıfrlyq tehnologıalardy qoldaný negizgi máselelerdi sheshe alatyny týraly baǵdarlamada jazylǵan. Iaǵnı, medısınalyq kómektiń qoljetimdiligi men sapasy, sondaı-aq aýrýlardyń aldyn alý máseleleri sheshiledi. «Densaýlyq saqtaýdy sıfrlandyrý medısınalyq qatelikterdiń sanyn tómendetýge, qyzmet kórsetýdiń sapasy men jyldamdyǵyn, sondaı-aq basqarýshylyq sheshimderdi qabyldaý sapasyn arttyrýǵa múmkindik beredi», – delingen atalmysh baǵdarlamada.
Buǵan qosa, sıfrlyq jańashyldyqtar eńbek ónimdiligin arttyrýǵa, halyqqa kórsetiletin qyzmet sapasyn jaqsartýǵa baǵyttalyp otyr. Bul óz kezeginde pasıentter men dárigerlerdiń ýaqytyn 50 paıyzǵa deıin únemdep, dárigerge barýdy 2 esege qysqartady. Eń bastysy – dıagnoz qorytyndylary ýaqtyly shyǵady. Bul buǵan deıin osy saladaǵy túıtkildi problemalardyń biri sanalǵan edi. Sonymen qatar, elektrondy kezektiń arqasynda kezek kútý ýaqyty 30 paıyzǵa azaımaq. Munyń nátıjesi túrli shıelenister men kóptegen jaısyzdyqtardy boldyrmaýymen kórinedi.
Atalǵan máselelerge baılanysty halyqtyń sıfrlyq saýattylyǵyn arttyrý mańyzdy. Osy oraıda, Mańǵystaýdaǵy densaýlyq saqtaý uıymdarynyń bastamasymen sıfrlyq saýattylyqty úıretetin 29 oryn ázirlengen. Bul 2018 jyldyń 1-shi sáýirinen qolǵa alynyp, búginde 321 myńnan astam adam medısınalyq sıfrlyq saýattylyq kýrsynan ótken.
Mańǵystaý oblysynda sıfrlandyrý jumystaryna sáıkes, mynadaı jumystar atqarylýda: densaýlyq saqtaý mekemeleriniń 89-y ınternetpen qamtamasyz etilgen; 2612 jumys ornynyń 98 paıyzy kompútermen jabdyqtalǵan; 34 densaýlyq saqtaý ortalyǵy medısınalyq aqparattyq júıemen 100 paıyz qamtylǵan. Onyń ishindegi 29 densaýlyq saqtaý mekemesi qaǵazdan bas tartyp, elektrondyq qujat aınalymyna kóshken. Taǵy da aıta keterlik jaıt, óńirde medısalyq qyzmet usynatyn mobıldi baǵdarlamalar da jaqsy jumys isteýde. Statısıka boıynsha 115 myńnan astam adam mobıldi qosymshaǵa tirkelipti. Elektrondy densaýlyq pasportyna da kóshý prosedýrasy joǵary satyda tur. Iaǵnı, halyqtyń 94 paıyzy elektrondyq medısınalyq tólqujatpen qamtamasyz etilgen. Al aqparattyq júıelerdiń qyzmetin 1 623 320 adam paıdalanǵan.
Esterińizge sala ketsek, «Sıfrlyq Qazaqstan» baǵdarlamasynda densaýlyq saqtaýdy sıfrlandyrýdyń basty maqsaty retinde densaýlyq saqtaý júıesiniń tıimdiligin arttyrý, medısınalyq kómektiń sapasy men qoljetimdiligin arttyrý, medısınalyq qatelikterdiń sanyn azaıtý, ortasynda emdelýshi men onyń densaýlyǵy týraly aqparat turatyn júıeni qurý belgilengen.
