2018 negatıvke de, pozıtıvke de toly jyl boldy. Shyny kerek, "adamdy óltirip ketti, zorlap ketti, tirideı órtenipti" degen syndy negatıv jańalyqtar halyqtyń esinde saqtalyp qalady. Tipti talqylaýǵa des bermes taqyryptar desek te bolady. Al sol 365 kúnde álemde qanshama jaqsylyqtyń jasalǵanyna habardarsyz ba? 2018 jyl álemde qandaı jaǵymdy jańalyqtarymen este qaldy, álemdi súısintken qandaı oqıǵalar oryn aldy, bir jylda búkil álemdi ózgertken keıipkerler kim? Sondaı oqıǵalardyń 10-yn tizip kórdik.

Facebook – uly kúsh. Erekshe oqıǵańyzdy jazsańyz, áp-sátte búkil álemge tanymal bolyp shyǵa kelesiz. 2017 jylǵy kórsetkishke sáıkes, Facebook áleýmettik jelisine 2 mıllıardqa jýyq adam tirkelgen. Tómendegi oqıǵalardyń bári derlik atalmysh jelige jarıalanyp, tanymaldylyqqa ıe boldy.

1.7 jasar bala qaıtys bolǵan ákesine hat jazady. Qyzyǵy, balanyń hatyna jaýap kelgen.

«Poshtashyǵa. Myna hatymdy kókke ákeme jibere alasyz ba? Búgin onyń týǵan kúni edi. Raqmet».

Shotlandıa turǵyny, 7 jasar Djeıs Hındmannyń ákesi osydan 4 jyl buryn o dúnıelik bolǵan. Biraq Djeı men ápkesi ár jyl saıyn ákeleriniń týǵan kúninde quttyqtaý hatyn jazyp turady. Alaıda osy jolǵysy erekshe edi. Bala kezekti hatyn poshtashydan kókke jetkizip berýin ótingen. Birneshe kúnnen soń balaǵa poshta qyzmetinen jaýap ta kelgen. Onda «hatyńyz esh qıyndyqsyz tıisti meken -jaıǵa jetkizildi. Juldyzdarmen jáne ǵarysh nysandarymen alysyp otyryp jetkizdik» delingen. Djeıstiń anasy Terı Koplend bolǵan oqıǵany Facebook jelisindegi paraqshasynda jazdy. Biraq jazbasynyń asa tanymal bolyp keterin ana bilmedi. 502 myń qoldanýshy «Unatý» belgisin basyp, 276 myń adam Repost jasaǵan. Bul kóptiń kóńilin tolǵandyrǵan, perishte júrektiń senimin taptamaýǵa úıretken keremet oqıǵanyń biri osy boldy.

2.Italándyq IKEA-ǵa qańǵybas ıtter qonystanǵan. Qyzmetkerler ıtterge barynsha qamqorlyq tanytyp júr, keıbir ıtterdi satyp alýshylar da tabylǵan.

Italıadaǵy Katanıa qalasynda IKEA qyzmetkerleri qańǵybas ıtter úshin dúken esigin ashyq qaldyryp qoıǵan. Itter munda kirip uıyqtaıdy, jatyn bólmelerde jylynady, al qyzmetkeler olardy tamaqtandyrady. Dúkenge kirgen tutynýshylar dúkennen jańa zatpen emes, tipti ıtpen shyǵyp jatady.

3.Er adamǵa joǵalǵan ámıanyn qaıtaryp bergen, bos qalpy emes, ishine 40 dollar salyp...

Ońtústik Dakota turǵyny Hanter Shamett ápkesiniń úılený toıy úshin Las Vegasqa ushyp barady. Alaıda ushaqta ámıany men qujattaryn joǵaltyp alady. Ámıanynyń ishinde 60 dollar aqsha bolǵan. Jigittiń kóńil-kúıi túsip, tabylatynynan úmitti bolmady. Birneshe kúnnen soń Hanterge sálemdeme keledi. Ashyp qarasa, óziniń ámıany men hat jatyr eken. Onda «Hanter, seniń ámıanińdi Omaha ushaǵynan taýyp aldym. Oryndyq pen ushaq qabyrǵasynyń ortasyna túsip qalypty. İshindegi 60 dollardyń janyna taǵy da 40 dollar salyp qoıdym. Ámıanińdi qaıtarǵanyńnyń qurmetine jaqsylap toılarsyń» dep jazylǵan eken.

Bul oqıǵany anasy Djınnı Shamett Facebook-tegi jeke paraqshasynda bólisti. Ári hattyń ıesin de izdestirip jatqanyn jazǵan.

4. Kalıfornıalyq dáriger  órt kezinde  óziniń Toyota kóligimen adamdardy órtten alyp shyqqan. Kólik janyp ketti, esesine adamdar aman qaldy. Al kompanıa medıkke jańa kólik syılady.

Kalıfornıanyń Paradaız qalasynyń turǵyny Allın Prıs adamdardy ormandaǵy janǵan órtten qutqaryp qaldy. Toyota kóligine otyryp, naýqastardy qutqarý úshin ol aýrýhanaǵa eki márte oralǵan. Bul oqıǵadan keıin  Allın kóliginiń órtengen túrin sýretke túsirip, Facebook jelisindegi paraqshasyna salady. «Toyota Tundra menimen qosa birneshe adamnyń ómirin qutqaryp qaldy» dep jazady. Artynsha Toyota kompanıasynyń resmı akkaýntynan Allınge habarlama keledi. Onda «Toyota Tundra-men qosa óz ómirińizdi qurban etip, adamdardy órtten qutqaryp qalǵanyńyz úshin alǵysymyzdy bildiremiz. Alańdamańyz, bizdiń kompanıa órtengen kóligińizdi jańasymen aýystyryp berýge daıyn» dep jazylǵan.

5.Reseılik jigit óz aqshasyna múgedekter men ardagerlerdiń páterine jóndeý jumystaryn jasap berip júr.

Ekaterınbýrg turǵyny Anton Savchýk óz aqshasyna úıge arnalǵan jabdyqtardy satyp alyp, jóndeý jumystaryn jasap júr. Tegin... Kimge deısiz ǵoı? Múgedekter men ardagerlerdiń úılerine... Dál qazirgi ýaqytta múgedek áıel men 95 jastaǵy soǵys ardageriniń páterine jóndeý jumystaryn júrgizý ústinde. Bul týraly Anton óziniń YouYube kanalynda baıandap otyrady.

6.Kásipker qańǵybasqa jumys berip, ómirin ózgertti.

Otıs Oýıll Vıláms esimdi kásipker Facebook jelisindegi paraqshasynda erekshe qyzmetker jaıly post jazdy. «Osydan 7 aı buryn bul jigitti ýaqytsha jumysqa ornalastyrǵan edim. Onyń ne úıi, ne isher asy, ne kıimi bolmaǵan. Kópiri jaǵalap júrgen bir beıbaq edi. Jumysqa turǵan kúnnen bastap, birde - bir ret keshikken emes, jumysyn tıanaqty oryndap júrdi. Al búgin ata-anasymen qaýyshty, kóligi de, kıimi de bar. Ári meniń kompanıamnyń resmı qyzmetkeri", - dep jazdy. Otıstiń meıirimdiligi jeli qoldanýshylaryn tánti etti, ol áleýmettik jelide 200 myń «unatý» belgisin jınady.

7.Dúkende belgisiz bireý adamdardyń azyq-túliginiń aqshasyn tólep bergen.

Amerıkalyq Djýl Enn Geıts Facebook-tegi paraqshasyna dúkende bolǵan tańǵalarlyq oqıǵany jazypty. Ózi  ulyna syılyq almaq bolyp dúkenge barǵan. Aqshasyn tóleý úshin kasaǵa kelse, adamdar báriniń aqshasyn ózi tólep jatqan meıirmdi jan jaıly kúbirlesip turady. Rasynda, belgisiz jan Djýlldyń da 200 dollaryn ózi tóledi. «Álgi jumbaq janǵa alǵys aıtýdan jalyqpaımyn!» dep jazdy áıel paraqshasyna.

8.Taksıst artqy oryndyqta ámıanyn umytyp ketken jolaýshyny kólikte 8 saǵat kútken.  

Dýblın turǵyny, reseılik Varvara Borsova jeke paraqshasyna taksıshiniń boıyndaǵy erekshe qasıetti jazyp, halyqty bir marqaıtyp aldy. «Búgin tańǵy 5-te Máskeýge qonyp, taksı ustadym. Júrgizýshi Qyrǵyzstannan kelgen eken, úıge jetkenshe áńgimelesip bardyq. Úıime kelip, bir myzǵyp alýdy jón kórdim de, oıanǵan soń ámıanymdy álgi taksıde umytyp ketkenimdi túsindim. Qoldaý qyzmetine habarlastym, biraq kólik tabylmady. Kartamdy buǵattamaq bolǵanda, terezege úńilgen ákem aýlada taksı kóliginiń turǵanyn aıtty. Úıden atyp shyqsam, qyrǵyzstandyq taksıshi tur eken. Meni aýlada 8 saǵat boıy kútken eken. «Osynshama ýaqyt uıyqtaýǵa bola ma eken? Tońyp qaldym ǵoı!» dep jymıyp tur. Qýanyshtan ba, bilmedim, jylap jiberdim de, jigitti qushaqtadym. Ol da jylady. Tipti «tamaqtandyń ba?» dep te suramappyn ǵoı? Ol – ǵajap adam. Oǵan alǵys retinde kóp aqsha berdim, biraq rızashylyǵym sheksiz edi».

9.Muǵalim ushaqta ózimen ushyp bara jatqan jolaýshyǵa kedeı otbasynan shyqqan oqýshylar jaıynda aıtyp berdi. Muny estigen ózge jolaýshylar oqýshylarǵa aqsha jınap, muǵalimnen berip jiberdi.

Chıkagolyq muǵalim Kımberlı Bermýdes ákesiniń kóńilin surap qaıtý úshin Florıdaǵa ushady. Ushaq ishinde janynda otyrǵan ol jolaýshymen til tabysyp ketedi. Jolaýshy muǵalimnen "jumys barysynda eń qıyn soǵatyn ne nárse?" dep suraǵanda, Kımberlı «mektepke ash kelip, ash ketetin, kıerge kıimi joq kedeı otbasynan shyqqan oqýshylarǵa qaraý – qıynnyń qıyny» dep jaýap beredi. Sóıtip artqy oryndyqta Kımberlıdiń sózin muqıat tyńdap otyrǵan taǵy bir jolaýshy "oqýshylar úshin" dep aqsha beredi.. Taǵy eki jolaýshy dál osylaı isteıdi. Bul jaıynda jeke paraqshasyna jazǵan muǵalim jalpy 530 dollar aqsha jınalǵanyn aıtty.

  10.Pısserıa qoqys sheleginen tamaq izdegen qańǵybas úshin esigine habarlandyrý ilip qoıdy.

Reddit qoldanýshysy Soltústik Dakotadaǵy pısserıanyń esiginen erekshe habarlamany baıqap, sýretke túsirip alady. Onda «Bul bizdiń qoqys shelegimizden tamaq izdep júrgen adamǵa arnalady. Qoqystaǵy tamaqqa emes, siz bar jaqsyǵa laıyqty jansyz. Bizdiń meıramhanaǵa kirip, tegin tamaqtanyp ketýińizdi ótinemiz. Artyq suraq qoımaımyz» dep jazylǵan.