Baqsynyń eminen keıin kóz jumǵan marqum jigittiń týystary emshige qarsy is qozǵalǵanyna qarsy. Dástúrli medısınadan shıpa bolmaǵandyqtan, aqyl-esiniń aýytqýynan úsh jyldaı qınalǵan 28 jastaǵy jigitti jaqyndary baqsyǵa óz erikterimen ákelipti. Alaıda naýqas 4 kún buryn belgisiz jaǵdaıda qaıtys boldy dep jazady Qamshy.kz aqparat agenttigi "Almaty" telearnasynyń deregin negizge alyp.

Polısıanyń dereginshe, Shamalǵan aýylynyń turǵyny aýyr dene jaraqatynan qaıtys bolǵan. Alaıda,  emshi jigittiń denesindegi jaraqattardy buryn da baıqaǵanyn aıtady. Ekzorsızm seansy, ıaǵnı "kisi deneden jyn qýý kezinde qaıtys boldy" degen aıyp shyndyqqa janasa ma? Tergeý ızolátorynan qolhatpen shyqqan baqsyny marqumnyń týystary nege aıypqa tartqysy joq? 

"Alla qur qaldyrmas. Sondyqtan muny Allanyń buıryǵyna, taǵdyrdyń jazýyna qaldyraıyq. Jaqsylyq emes, men sezemin, jaqsylyq emes. Men qazir kinálimin de. Sondyqtan eki jyldan tórt jylǵa shartty jaza alýym múmkin, bolmasa ármen qaraı ketip qalarmyn", — deıdi emshiniń ózi.

Tórt búrkit, úsh tazysyn serik ertken Ábdikárim qusbegilik ónerimen óńirge tanymal. Úıindegi maqtaý qaǵazdary men kýboktary ulttyq sportqa qosqan eńbegine oraı berilgen. 63 jasynda "jyn kirgen jandy emdeımin" dep basy daýǵa qalǵan qusbegi birneshe kún qamalǵan soń, búgin qolhatpen bostandyqqa shyǵypty.

"Iá, qolyn baılap alyp keledi. Solaı alyp ketedi. Kúndiz, tańerteń ákeledi. Bir saǵattaı emdeıdi, sodan qaıtyp ketedi", — dep mán-jaıdy baıandap ótti qusbeginiń áıeli.

Em suraǵanǵa dem berý qasıeti bar qusbegi em-dom kezinde duǵadan ózge, qamshy, múıiz syndy zattardy qoldanady eken. Qasqyr men túlki terisi ilingen shaǵyn bólmeniń qabyrǵasyndaǵy qyzǵylt tús – 28 jastaǵy Turar Orazalıevtiń qany.

"Tynyshtalmaı, basyn qabyrǵaǵa soqty, biraq kúdikke ilingenime ókinbeımin. Aýyrǵan jandy jaqyndary baılap, qolyn kisendep ákelip, jarty saǵat em salǵan soń, alyp ketetin. Jetinshi kúnge qaraǵanda esin jınap, jaqsaryp qalǵan edi", — deıdi qusbegi.

Al jigittiń týystary Turardy úıde baılap ustaǵandaryn, ol óziniń saýsaǵyn da shapqanyn, kóliktiń astyna da júgirgenin baıandady.

"Aıtýynsha,  jatqan kezde aýzyma bir nárse kirip ketti dedi. Sodan qarańǵy bólmege qasha beretin boldy. Qatarǵa qosylmaıtyn boldy. Bireýler jyn dedi, bireýler dýalaǵan dedi. Birtúrli bolyp ketti", — dedi marqum Orazalıevtiń aǵasy Amantaı.

Qabyrǵasy kúldirep qaıtys bolǵan jigitti jaqyndary Talǵardaǵy júıke aýrýlary aýrýhanasynada jatqyzǵan. Jany jaı tappaǵan jigit ózine birneshe ret qol jumsamaq bolǵan soń, týystary ony úıde kisendep, kúshpen ustapty.

"Otyn shabamyn" dep qolyn shaýyp tastaǵan. Sodan qashyp, Shamalǵan stansıasyna ketip qaldy. Odan mashınaǵa salyp, Uzynaǵashqa alyp keldi. Men Uzynaǵashqa baryp, Qaskeleńdegi aýrýhanaǵa apardyq. Bilmeımin ǵoı, jyn kirse, neshe moldaǵa bardy, jazylmady ǵoı. Psıhıkalyq aýrýǵa shaldyqqan ba deımin", — dedi marqumnyń týysy Erkeǵalı Ábdiǵalıev.

Marqumnyń týystary tikeleı kameraǵa tildesýge qarsy boldy. Biraq aýyzeki aıtýlaryna qaraǵanda, olar medısınadan medet tappaǵan soń, baýyrlaryn qyryqtan astam emshi men moldaǵa aparyp emdetken. Alaıda, jigitke em de, es te kirmeı, ómiriniń sońy osylaı ókinishpen aıaqtalǵan.

"Búrkitshi kináli emes, taǵdyry solaı boldy. Sondyqtan aldaǵy ýaqytta sońǵy ret aparyp emdetken baqsyny sotta barynsha aqtap alýǵa tyrysamyz, oǵan ókpe, renishimiz joq", — desti.