"Qajylyq qorynan" 103 ımamǵa qarajat aýdaryldy dep jazady Qamshy.kz aqparat agenttigi. Bas múftı Serikbaı qajy Orazdyń sheshimen ózin-ózi qarajatpen qamtamasyz ete almaıtyn meshitterdiń ımamdaryna 50 myń teńge kóleminde jalaqy berildi. Bul týraly QMDB baspasóz qyzmeti habarlady.  

"Elimiz boıynsha 2058 aýyldyq meshit bar. Onyń basym bóligi ózin-ózi qarajatpen qamtamasyz ete almaıtyn meshitter. Aýylda aılyqsyz qyzmet etetin din qyzmetkerlerin tolyqtaı jalaqymen qamtamasyz etý josparymyzda bar. Alǵashqy kezeń boıynsha búgin 103 aýyl ımamyna "Qajylyq qory" esebinen 50 myń teńge qarajat aýdaryldy. Osylaısha, ımamdardyń áleýmettik máselesin kezeń-kezeńimen sheshýdi kózdep otyrmyz", – dep atap ótti QMDB Tóraǵasy Serikbaı qajy Oraz.

Aıta keteıik, elimiz boıynsha, 2626 meshitte 6189 adam qyzmet etedi. Onyń 4 myńǵa jýyǵy – din qyzmetkeri. Jalpy din qyzmetkerleriniń 30 paıyzy ǵana tolyqqandy jalaqymen qamtamasyz etilgen.