Qazaqstan Respýblıkasynyń Prezıdenti Nursultan Nazarbaevtyń jáne Qoǵamdyq damý mınıstri Darhan Qaletaevtyń nazaryna!
Búgin Astanada «Táýelsizdiktiń urpaqtary» atty jastar jylynyń ashylý saltanaty ótti. Oǵan Prezıdent Nazarbaev qatysyp, óziniń jańashyl bastamalaryn aıtty. Jastardyń aldynda turǵan máselelerdi sóz etti. Tapsyrmalar berdi. Prezıdent jalyndap sóılegen jastardy tyńdady. Biz de tyńdadyq.
Bul forýmdy uıymdastyrýshy kim? Qoǵamdyq damý mınıstrligi jáne onyń basshysy Darhan Qaletaev. Jastar jylynyń osylaı joǵary leppen bastalǵany durys-aq delik. Biraq...
Prezıdentke deıin sóılegen 13 jastyń 5-eýi ǵana forýmda memlekettik tildiń mártebesin asqaqtatty. Osyǵan qatysty Qaletaevqa suraq...
- Jańadan qurylǵan Qoǵamdyq damý mınıstrligi AtaZańda jazylǵan memlekettik tildiń mártebesin moıyndamaı ma?
- Jastar bizdiń bolashaǵymyz, olar táýelsiz eldiń urpaqtary emes pe?
- Búgin memlekettik tilde sóılemegen jas erteń anasynyń tilin aıaqasty etpeı me?
- Bir jıyndy bastan aıaq qazaq tilinde ótkizýge Qaletaevtyń qaýqary nege jetpedi?
- Qoǵamdyq damý mınıstrligi osy áreketi arqyly memlekettik tildi mensinbeıtin jas urpaqty tárbıelep jatqan joq pa?
- Sózdiń jartysyn qazaqsha, qalǵanyn orys tilinde jalǵastyratyn aǵa býynnyń abyroısyz áreketin jastarǵa ádeıi juqtyryp jatqan joqpyz ba?
- Jıynda basqa ult ókilderi de aksentsiz, qazaq tilinde taza sóıledi. Másele jastarda emes, ózimizde ekenin Qaletaev syndy mınıstrler nege túsinbeıdi?
- «Jıynda otyrǵan basqa ulttyń jastary uqpaı qalady» degen kóńiljyqpastyq áreketten Qaletaev mınıstrligi qashan arylady?
Jastar jylyna oraı tikeleı efırden berilgen jıyndy kórip otyryp, osylaı ári - sári oıǵa qaldyq. Jalyndap turǵan jastardy búginnen bastap memlekettik tildi qadirleýge úıretpesek, erteń tilińdi mensinbeıtin tolqyn ózi-aq ósip shyǵady.
Ras, biz jıynda jetistikke jetken jastardy Elbasynyń aldynda urandatyp sóılettik. Al jetistikke jete almaı júrgenderdi Qaletaev mınıstrligi qashan qoldaıdy?
...Mınıstr Darhannyń dúnıetanymyna oı salar degen turǵyda bizdi alańdatqan saýaldar osy edi.
