Búginde ataqty akterlerdiń qalamaqysy bir adamnyń birneshe jyldyq tabysyna teń bolatyndaı jaǵdaıǵa jetti. Keıbiriniń jyldyq tabysyna bútindeı bir aımaqty asyraýǵa bolady desek, artyq aıtqandyq emes. Al olar mundaı qarajatyn qaıda jumsaıdy? Ádette kópshiligi jaıly ómir súrý úshin janyna keregin bárin alyp, jarqyraǵan jaquttan bastap, tipti bútindeı bir araldy satyp alyp jatady. Degenmen, bes saýsaq birdeı emes. Álemde kózi kórgen jyltyraqqa qumarta bermeı, aral nemese ıahta satyp alǵannan, aýyr jaǵdaıdaǵy balalardyń taǵdyryna beı-jaı qaramaıtyn mıllıonerler de bar. Olar saýsaqpen sanarlyq bolsa da, búgingi qoǵamda ondaı jandar barshylyq jáne jurt olardyń atqaryp jatqan isteriniń birin bilse, birin bilmeıdi.
Qamshy.kz aqparat agenttigi óziniń áleýmettik dárejesine ǵana mán bermeı, álemdegi jaǵdaıǵa da kóz qyryn salyp, qarjysyn qaıyrymdylyqqa jumsaıtyn 8 mıllıonerdi nazarlaryńyzǵa usynady.
Gosha Kýsenko
2011 jyly akter Gosha Kýsenko «Birge qadam basaıyq» atty qordyń negizin qalap, DSP-men aýyratyn balalarǵa kómek kórsete bastady. Sodan beri akter shoý-bıznes pen jeke kásipker dostarynyń basyn qosyp qaıyrymdylyq konsertin jıi uıymdastyryp turady.
Natalá Vodánova
Áıgili top-model Natalá Vodánova 2004 jyly balalarǵa arnalǵan oıyn alańdaryn salýmen aınalysatyn «Jalańash júrekter» atty qor qurady. 2011 jyldan bastap atalmysh qor syrqatqa shaldyqqan balalary bar otbasylarǵa kómektesip keledi.
Natalányń qaıyrymdylyq isteri tek TMD ǵana emes, sondaı-aq búkil Eýropa elderine de belgili. Ol únemi qaıyrymdylyq keshterin uıymdastyryp otyrady.
Konstantın Habenskıı
Akter Konstantın Habenskıı 2008 jyly onkologıalyq jáne basqa da aýyr dertke shaldyqqan balalarǵa kómek kórsetetin ortalyq ashqan. 2013 jylǵa deıin atalmysh qor 130 balaǵa kómektesip úlgerdi.
«Jer betinde adam ómirinen qundy eshnárse joq, analardyń baqytqa toly kózderin kórgende ishteı qýanyp ketemin jáne sol nárse maǵan kúsh-qýat syılaıdy», - deıdi akter.
Sholpan Hamatova
Sholpan Hamatova – 2006 jyly «Ómir syıla» atty qordyń negizin qalaǵan aktrısa. Ashylǵan kúnnen bastap atalmysh qor gematologıalyq jáne onkologıalyq dertke shaldyqqan balalarǵa qoldaý kórsetip keledi, al aktrısa Hamatova únemi aýrýhanalarǵa qajetti jabdyqtar men preparattardy satyp alýǵa kómektesip, demeýshilik bildirip turady. Sonymen qatar, túrli eriktiler tobyn quryp, qan tapsyratyn donorlardy tabýǵa kómektesedi.
Kıaný Rıvz
Kıaný Rıvz – óte qyzyqty personaj. Ony metroda, kóshede ketip bara jatyp nemese úıi joq adamdarmen sóılesip turǵan jerinen kórip qalýǵa bolady. Sondaı-aq, onyń ózine tıesili kóligi, tipti úıi de joq. Akter áli kúnge deıin páter jaldap turady. Kıaný Rıvz shalqyp ómir súrýdiń esh máni joq dep esepteıdi, alaıda ózge jandarǵa eshqashan da kómegin aıaǵan emes.
Onyń qaryndasy aq qan aýrýyna shaldyqqan eken, keıinnen akter onkologıalyq aýrýǵa shaldyqqan balalarǵa kómek berý maqsatynda óziniń jeke qoryn ashqan. Sonymen qatar, ol túrli ekologıalyq jobalarǵa belsene atsalysyp, janýarlardyń quqyǵyn qorǵaý jumystaryna qatysady.
Leonardo Dı Kaprıo
Leonardo Dı Kaprıo erte tanylyp, gonorary eń qymbat akterlerdiń birine aınalǵan. Sondyqtan da, ol aqshanyń qunyn erte bastan túsine bilgen. 1998 jyly akter 15 mıllıon dollaryn 30 túrli uıymǵa qaıyrymdylyqqa bergen qordyń negizin qalady.
Keıt Mıddlton
Kembrıdjdik gersogınıany búginge deıin qoǵamda "patsha otbasynyń múshesine saı áreket etpeıdi" dep birneshe ret aıyptaǵan bolatyn. Alaıda Keıt Mıddlton mundaı qańqý sózderdiń birine de mán bermeıdi.
Ol óte qarapaıym, Ulybrıtanıada áleýmettik statýsy ózge brıtandyqtardan joǵary bolǵandyǵyna qaramastan Mılan nemese Rımde shyqqan sońǵy úlgidegi kıimderdi emes, qarapaıym markaly kıimderdi kıgendi unatady eken. Ol óziniń jubaıy Ýılámmen birge qaıyrymdylyqqa óte kóp mólsherde qarjy jumsap otyrady.
Adjelına Djolı
2001 jyly Kambodja qalasynda Andjelına Djolıdiń qatysýymen «Lara Kroft» fılmi túsirilgen bolatyn. Sondaǵy jergilikti halyqtyń qanshalyqty tómen jaǵdaıda ómir súrip jatqanyn kórgen aktrısanyń qaıyrymdylyqqa qyzyǵýshylyǵy oıanady.
Andjelına Djolı Afrıkadaǵy balalarǵa arnap birneshe qor ashqan. 2005 jyly aktrısa BUU-nyń gýmanıtarlyq syılyǵymen marapattalyp, 2013 jyly volonterlik gýmanıtarlyq kómegi úshin ataqty «Oskar» syılyǵyn ıelengen.
Búginde álemde qaltaly qaıyrymdy jandardyń tizimi uzaryp keledi.
