Kópten beri kókeıimde júr edi. «Bul ózi bizdiń qazaqtyń qanynda bar. Bolsyn demeımiz, etekten tartamyz. Dımashqa múldem qatysy bolmasa da aýzyna kelgendi aıtyp jatyr. Al oǵan qara halyq «betke aıtty» dep qol soǵady. Keıbireý onyń sózin de túsinip jatqan joq. «Rınatqa ondaı sóz aıtý uıat!» dep jazdy belgili ánshi Maıra İlıasova. Munysy, Dımashty synǵa alǵan Rınat Zaıytovty «dyhalkadan» bir urǵandaı boldy, meniń  de delebem qozyp ketti.

Shynynda «boıaýshy, boıaýshy degenge saqalyn da boıapty» degendeı aıtysker aqyn kim? Álemge áıgili Dımash Qudaıbergen kim?  Arasy jer men kókteı ǵoı. Bılikke qarsy shyndyqty shyryldap aıtyp júrgeni jaqsy, onda da, qyzdy-qyzdymen qıa shaýyp ketetin tustary da jetirlik.  Jaraıdy, betke aıtyp, betińdi «jyrta salatyndaı» jyldam aýyz ekenin eskersek te, ózine úsh qaınasa sorpasy qosylmaıtyn , bilimi jetpeıtin jaǵdaılardyń jaǵasyna jarmasyp, ózinshe kirpıaz pikirlerdi laq etkize salatyn minezin túsine almaıdy ekenmin.  Kezinde «Shyńǵyrǵannyń bári ánshi emes» dep yqylyq atqanyn keshirdik, al endi kelip  «Talqylaıyq» baǵdarlamasyna suhbat bergende: «Dımash Qytaı saıasatynyń qurbany» degeni qaı sasqany? «Talant pen ultqa qyzmet etetin adamdy ajyrata bilý kerek. Ekeýi múlde eki bólek. Men Dımashty «Sendeı ánshilerden qorqamyn» dep synaǵanda, bizdiń jastardyń onyń sońynan eretinin bildim. Al Dımashtyń qazirgi obrazyn kim qalyptastyrdy? Qaı ult qalyptastyrdy? Qytaı qalyptastyrdy ma? Olar bizdiń balany bizge qarsy paıdalanyp jatyr. Men osylaı bolatynyn bilgenmin» dep sáýegeılik tanytqanyn túsine almaı júrmin."Bizge qarsy paıdalanyp jatsa", dálelderi qaısy?  Sonshama Dımashtyń sońyna túsip alatyndaı, ol ne istep qoıdy eken? Álde, ónerdegi qyzǵanysh pa? Qol soǵyp, qýanýdyń orynyna syımaıtyn basyn ár jerge tyǵa beredi kelip!  Al nege Rınat inim tyrjalańash sheshinip, sáýkelemizdi  masqaralaǵan Shyryn  degen  bireýdiń sońyna sham alyp túspeıdi? Halyqtyń saýabyn alar edi ǵoı? Nege keýdesin maqtan tutyp, halyqqa kórsete beretin Baızaqova týraly  bir aýyz sóz aıta almaıdy? Álde, oqymadym ba?

Dımash Qudaıbergen qazaqtyń baǵy, onyń kemshiligin jasyryp, jaqsy jaǵyn asyrýymyz kerek. «Dımash aldymen ózin qazaqqa tanytty. Al Qytaı men Reseıdiń, Anglıanyń jasaǵan jarnamasyna bizdiń shashymyz jetpeıdi. Qazaq qazaqty moıyndaý úshin Qytaıdy moıyndatýy kerek boldy degen pikirmen túbegeıli kelispeımin" , - dep qoldaǵan Maıra İlıasovanyń pikirine men de qosylamyn.

Muhtar Sherim,

jazýshy-syqaqshy