Balanyń dúnıetanymyn arttyrý úshin ne isteýimiz kerek? Kitap oqytqan durys. Degenmen jas balany kitap oqýǵa qalaı úıretkenimiz durys? Sábı kezinen baýlý kerek desek te, keıde biz kóp nárseni eskere bermeımiz. Ásirese, mektepke áli bara qoımaǵan balanyń kitapqa qulshynysyn qalaı oıatamyz? Onymen qalaı áńgimelesý kerek? Neni oqytamyz? Neni qaperge alý kerek?
1. Balańyzǵa ertegi kitap oqyp beretin bolsańyz, alańdamas úshin eń aldymen úıdegi teledıdar men kompúterdi óshirip qoıyńyz. Sondaı-aq mańaıdaǵy oıynshyqtardy jınap, kózge kórinbeıtin jerge qoıý kerek.
2. Kitapty bir sarynmen oqýdyń esh qajeti joq. Mánerlep oqyǵannyń kóp paıdasy bar. Onda da balanyń qyzyǵýshylyǵyn oıatý úshin daýysyńyzdy birde joǵary kóterip, tómendetip, keıde jyldam, keıde baıaý kúıge túskenińiz durys. Bul balany jalyqtyrmaıdy, qaıta qyzyǵýshylyǵyn oıatady.
- Jalpy túrli-tústi sýreti bar ertegi kitappen jumys istegen durys. Arasynda balańyzdan sýrette ne beınelengenin ózińiz de jıi surap turyńyz. «O, óte durys aıttyń, jaraısyń, meniń balam óte aqyldy ǵoı» dep maqtap, emosıańyzdy jıi bildirip otyryńyz.
- Balany sóıletip otyrý onyń sózdik qoryn damytatynyn esten shyǵarmańyz.
- Bezendirilgen, taqyryptyq kitaptyń bolǵany durys. Bul balanyń qorshaǵan ortaǵa qumarlyǵyn arttyrady.
- Muny belgili bir ýaqytta jasaǵan durys. Túste, túnde uıyqtar aldynda balańyzdy janyńyzǵa alyp kitap oqysańyz, sábı oǵan da úırenedi. Muny ádetke aınaldyrǵan abzal.
- Eger balańyz kitap oqyp, sýret salyp berýge ótinish jasasa, oǵan bola renjýdiń qajeti joq. Erinbeńiz, aıtqanyn isteńiz.
- Balaǵa kitap oqyp berýdiń ózi onymen ashyq áńgimelesý ekenin umytpańyz. Arasynda óleń jattatyp nemese án aıtqyzyp tursańyz, bul da jalyqtyrmaıdy.
- Balanyń jady myqty. Oǵan kitaptaǵy keıbir sóz ben sóz tirkesteri túsiniksiz bolýy yqtımal. Ony túsindirip berýge tyrysyńyz. Sonda ǵana onyń sózdik qory kóbeıip, sóıleý mádenıeti tereńdep, dúnıetanymy artady.
- Eń aldymen balaǵa kitapty májbúrlep tyńdatýdyń keregi joq. Mundaı qadam onyń bilýge, úırenýge qulshynysyn joıady. Sondyqtan óz jasyna saı, sýretteri úlken, mazmuny laıyqty kitap oqyp bergen durys. Sonymen qatar túrli-tústi qarandashpen boıalatyn arnaıy shaǵyn kitapshalarmen de jıi jumys istetkenniń paıdasy óte úlken.
