Bul týraly «Nur Otan» partıasy Tóraǵasynyń Birinshi orynbasary Máýlen Áshimbaev Facebook-tegi jeke paraqshasynda jazdy.

Astanada bolǵan qaıǵyly oqıǵaǵa qatysty pikir bildirgen ol bul jaıttyń qoǵamdaǵy ózekti máselelerdi anyq kórsetip bergenin aıtady.

«Rasymen, bes birdeı búldirshinniń qapyda qaza bolýy tutas halyqtyń qabyrǵasyn qaıystyryp jiberdi. Ókinishten ózegimiz órtenedi. Biraq amal joq. Endi osyndaı qasirettiń qaıtalanbaýy úshin áreket etýimiz kerek.

Bul jaıt qoǵamdaǵy keıbir ózekti máselelerdiń kezek kúttirmeı sheshýdi qajet etetinin kórsetip berdi. Shyn máninde, kóp balaly otbasylarǵa júıeli qoldaý kórsetý, jumys isteıtin analarǵa laıyqty jaǵdaı jasaý jáne balalar quqyǵyn qorǵaý máselesinde áli de bolsa jetildiretin tustardyń bar ekeni sózsiz. Sondyqtan da halyqtyń járdemaqy, baspana máselesine qatysty aıtyp, jazyp jatqan sózderi oryndy.

Osyǵan oraı «Nur Otan» partıasy bul baǵyttarda naqty usynystar daıyndaýda. Aldaǵy ýaqytta sol boıynsha Úkimetpen birlesip jumys istep, jaǵdaıdyń jaqsarýyna ózimizdiń úlesimizdi qosamyz dep senemin.

Sonymen birge partıa janynan Balalar quqyǵyn qorǵaý jónindegi keńes qurý týraly sheshim qabyldanǵanyn jetkizgim keledi. Osy baǵytta da búkil qoǵam bolyp jumylyp, óskeleń urpaqtyń jarqyn bolashaǵy jolynda birlesip jumys isteıik», – delingen jazbada.

Aıta keteıik, Máýlen Áshimbaev keshe de áleýmettik jeli arqyly qara jamylǵan otbasy men balalardyń ata-anasyna kóńil aıtty.